Sasirangan

Tumatan Wikipidia basa Banjar, insiklupidia bibas
Jump to navigation Jump to search

Sasirangan adalah kain nang manggambarakan budaya khas wan idintitas sandang buhan etnis Banjar di prupinsi Kalimantan Selatan.


Asal Usul[babak | sunting sumber]

Ngaran “Sasirangan” berasal matan kata "sirang" nang baarti dijarat atawa dijahit lawan tangan lalu dijuhut benangnya atau dalam istilah bahasa jahit-manjahit disambat "jelujur".

Kain Sasirangan

Panambaan kain sasirangan disambat jua kain langgundi, yakni kain tenun bawarna kuning. Kain dibari gambar, curak wan warna tantu nang sudah dipulaakan secara tradisiunal. Pada jaman Empu Jatmika bakuasa sabagai raja di Karajaan Negara Dipa tahun 1355-1362, kain langgundi dipakai sacara luas gasan bahan meulah baju ulih samunyaan warga nagara Karajaan Negara Dipa.

Bahari, kain sasirangan dipakai gasan ikat kapala (laung), gasan ikat pinggang dipakai kaum lakian wan gasan kakamban, karudung, atau udat (kemben) oleh buhan binian. Kain ini dipakai jua gasan pakaian adat pada upacara-upacara adat, bahkan dipakai pada acara tatamba urang garing. Tagal wayahini, kain sasirangan kada dipakai gasan acara spiritual haja. Kain sasirangan sudah manjadi pakaian gasan kagiatan sahari-hari.


Mutif wan Curak Kain Sasirangan[babak | sunting sumber]

Disain/corak didapat dari teknik-teknik jahitan wan jaratan nang ditantuakan ulih babarapa faktur, salain dari kumpusisi warna wan efek nang timbul, nang kaya : macam jujut (benang)/jenis bahan gasan menjarat.

Usaha gasan malindungi budaya Banjar nang ini, sudah diakui wan pamarintah malalui Dirjen HAKI Departemen Hukum dan HAM RI.

Mutif wan curak kain Sasirangan nang rancak didapati di daerah Kalimantan Selatan nang kaya :


  1. Iris Pudak
  2. Kambang Raja
  3. Bayam Raja
  4. Kulit Kurikit
  5. Ombak Sinapur Karang
  6. Bintang Bahambur
  7. Sari Gading
  8. Kulit Kayu
  9. Naga Balimbur
  10. Jajumputan
  11. Turun Dayang
  12. Kambang Tampuk Manggis
  13. Daun Jaruju
  14. Kangkung Kaombakan
  15. Sisik Tanggiling
  16. Kambang Tanjung

Maulah Kain Sasirangan[babak | sunting sumber]

Kain Sasirangan banyak banar diulah wan dipruduksi ulih pangusaha industri di dairah Kalimantan Selatan baik skala ganal maupun halus. Cara maulah kain sasirangan di Kalimantan Selatan kabanyakan masih mamakai cara tradisiunal nang kada parlu mamakai masin cetak.

Ulih karana itu maulah kain sasirangan ini rancak banar dimasukakan gasan bahan palajaran Muatan Lokal di sakulah-sakulah.

Sacara garis ganalnya, proses maulah kain sasirangan dibagi jadi 4 tahap: Parsiapan bahan, Maulah pula wan mutif, Pambarian warna, Pambasuhan - Panuntungan (finishing).

Parsiapan Bahan[babak | sunting sumber]

Proses parsiapan bahan tamasuk di dalamnya nang kaya manataki kain sasuai lawan ukuran sakira mayu gasan baulah tapih wan baju hagan lalakian atawa binian. Bisa jua kain ditapas dahulu cagar barasih.

Salain itu ada parsiapan kasumba gasan mawarnai kain. Kasumba pawarna nang dipakai kawa baasal dari bahan-bahan alami nang kaya daun pudak, tipakan, janar wan banyu puhun pisang. Kawa jua dipakai bahan kasumba ulahan pabrik kimia.

Maulah Pula wan Mutif[babak | sunting sumber]

Kain nang sudah ditatak-takai wan atawa sudah dibarasihakan lalu digambari plot-plot atawa mutif wan mamakai pinsil. Biasanya gambar ini diulah wan cetakan nang sudah ada bantuknya. Bubuhan nang baisi industri kain sasirangan biasanya sudah baisi cetakan mutif tatantu, jadi bagian nang batugas manggambari kain ini tinggal manjiplaki dari cetakan nang sudah ada.

Salanjutnya kain nang sudah digambari ngini dijujut jarang-jarang (dijalujur) sasuai wan pola nang tagambar di kain. Benang gasan manjujut lalu dijuhut gancang-gancang sampai kain marampit. Jujutan-jujutan nang gancang ini kena mahalangi dairah-dairah tatantu dari pangaruh pahisapan larutan kasumba pawarna. Kain lalu siap mamasuki tahap pawarnaan.

Pambarian Warna[babak | sunting sumber]

Bahan kasumba pawarna talabih dahulu kita larutakan dalam banyu panas. Amun nang dipakai bahan alami, maka kain kawa langsung diculupakan haja ka dalam larutan pawarna.

Kabanyakan industri nang maulah sasirangan mamakai bahan pawarna ulahan pabrik. Kasumba nang rancak dipakai ngarannya Naphtol (nang rancak dipakai gasan mawarnai kain batik jua). Bahan lain gasan bahan panulung tahap pawarnaan nang kaya soda api (NaOH), spiritus wan banyu manggurak. Awalnya kasumba diambil sacukupnya, lalu diencerakan pakai spiritus lantas diharu sambai larut sabarataan, ditambahi babarapa tetes soda api lalu ditambahi banyu panas sasuai kaparluan. Parlu diingati bahwa larutan kasumba ini harus jarnih.

Gasan maulah warna nang kita kahandaki, maka zat warna naphtol harus ditimbulakan atawa dispeksasi wan garamnya. Hagan malarutakan garamnya tinggal ditambahi wan banyu panas, diharu sampai warnanya bening.

Cara mawarnai kain yaitu nang panambaian manyapuakan kasumba naphtol ka kain, lalu sapuakan larutan garamnya, maka kena timbul warna di kain. Kain lalu ditiisakan lantas dibabak/dipaculi jujutannya.

Pambasuhan - Panuntungan[babak | sunting sumber]

Sahabis mamaculi jujutannya, kain dibasuh bakali-kali sampai banyu basuhannya barasih wan jarnih.

Kain diurak dijamur sampai karing.

Supaya rapi kain kawa jua digosok wan satrikaan cagar bakas jujutannya kada kalihatan.