Payung kambang

Payung Kambang ialah paring barangka nang babantuk lingkaran wan tungkat nang mahirip sabuting payung. Payung itu biasanya diulah tasusun matan bilah paring nang bajumlah ganjil. Jumlah bilangan ganjil ngini baraitan lawan ajaran Islam nang manyataakan Allah katuju bilangan ganjil wan ngaran-Nya bajumlah ganjil. Payung kambang ngini biasanya ditutupi lawan kartas minyak atawa kartas bawarna-warni gasan manukupi bagian atas rangka. Biasanya kartas nang dipakai bawarna habang wan putih.

Pada paring barangka digantung kambang barinting, nang isinya biasanya nang kaya mawar, kananga, campaka, kacapiring, sampai malati. Ada jua nang maandak duit kartas, makanan, wan sabagainya. Bila batamat di bulan Ramadan, ada jua nang maulah payungnya nang taganal. isi wan bantukannya sama haja, tapi biasanya isinya tabanyak makanan wan hintalu.

Payung kambang ngini biasanya diingkuti saikung di balakang nang batamat. urang nang batamat ngini biasanya ada nang mandampingi nang kaya ustaz atawa guru mangajinya. Payung kambang ini kaina dipakai gasan manaungi pasrta nang handak batamat Quran wan bahanu diarak baimbai wan pasarta sabalum palaksanaan batamat. Bila payungnya nang taganal biasanya diandak ditangah wan diandak baras sagantang di bawahnya. makanan wan hintalu ngitu biasanya dirabutakan pas buhan nang batamat sampai mambaca "Alam tarakai." Payung kambang nang tahalus ngini dipakai sagan batamat quran. Imbah dipakai sagan batamat, payung kambang ngini biasanya diandak ka kubur wali atawa ulama.