Pasar wadai
Pasar Wadai dalam bahasa Indunisia baarti pasar kue. Pasar Wadai adalah sambatan gasan pasar nang manjual wadai, wan jua makanan wan minuman. Pasar ngini dijadiakan budaya ulih suku Banjar rahatan bulan Ramadan.[1]
Sajarah Pasar Wadai
[babak | babak asal-mulanya]Pasar Wadai sudah ada di Banjarmasin, Kalimantan Salatan tumatan tahun 1970-an. Wayah nitu adanya kalumpuk-kalumpuk nang halus haja, kurang baaturan wan dianggap mangganggu kaindahan kuta. Mulai tahun 1980-an, ulih Pemkot Banjarmasin buhan padagang wadai nitu dikumpulakan di sabuah pawa, balalu dingarani Pasar Wadai Ramadan. Mulai wayah nitu, Pasar Wadai dijadiakan wadah wisata tahunan.[2]
Sakira manguatakan Pasar Wadai sabagai ubjik wisata, diulah lagi partunjukan rakyat, nangkaya kasanian tradisiunal tumatan madihin, lamut, rabana, japin, igal wan sani tradisi nang lain.[2]
41 Wadai Banjar
[babak | babak asal-mulanya]Pasar Wadai ngini kada marga handak malastariakan sani budaya Banjar haja, tagal jua gasan malastariakan makanan tradisiunal has Kalimantan Salatan. Banyak pamakanan nang handak punah lantaran jarang ditamui di hari-hari biasa, tagal kawa ditamui pas Pasar Wadai di bulan Ramadan.[2]
Ada kurang labih 41 macam pamakanan tradisiunal Suku Banjar nang dipinandui, tagal banyak jua nang kadada lagi tadata, lantaran pamakanan nitu cungulnya pas ada karasmin, atawa acara ritual nang lain haja ulih bubuhan suku Banjar. Pamakanan nang handak punah nitu nangkaya kalalapun, kakicak, sasagun, cucur, wajik, cangkarok batu, bubur habang, bubur putih, apam habang, apam putih, bingka barandam, garigit, ilat sapi, wan wadai satu.[2]
Banyak wadai has Banjar gasan babuka puasa nang cungulnya pas bulan Ramadan haja, misalnya bingka, amparan tatak, sari muka, sari pangantin, wan kararaban.[3]
Gasan urang Banua Kalimantan Salatan, wadai-wadai nang ditamui di Pasar Wadai pas bulan Ramadan ngini kada sakadar makanan haja, tagal sudah jadi bagian tradisi wan kabarsamaan saban babuka puasa. Sagala janis wadai-wadai manis nitu jadi simbul sugihnya budaya Banjar, wan pamakanan nang barikit dalam kahidupan urang Banjar. Adanya macam-macam wadai ngini maulah daya tarik surangan, maulah bulan Ramadan tarasa labih istimiwa wan rasa manis imbah saharian puasa.[4]
Parkambangan Pasar Wadai
[babak | babak asal-mulanya]Sairing wayahnya, Pasar Wadai kada gasan bubuhan Muslim nang puasa Ramadan haja, banyak jua urang non-muslim nang umpat manukar wadai di Pasar Wadai. Banyak nang manukari wadai has Banjar nang dipinandui sabagai wadai 41 macam nitu adalah urang Cina. Buhan katurunan Tionghoa nitu wani manukar larang pada nang lain. Buhannya nitu ada nang sudah lawas badiam di Kalimantan Salatan atawa mambawai kaluarga tumatan Jawa atawa dairah lain ka Pasar Wadai.[2]
Banyak jua wisatawan tumatan luar nagari nang datang ka Pasar Wadai. Bahanu buhannya imbah manukar wadai langsung mamakan di sana jua, padahal nang lain masih puasa. Tagal urang Banjar sudah paham wan maklum haja.[2]
Jujuhutan
[babak | babak asal-mulanya]- ^ Mahfuz, Aslam (15 Maret 2024). "Pasar Wadai Banjarmasin Tak Sekadar Jualan Takjil, Ada Unsur Budaya Banjar". Liputan 6. Diakses tanggal 26 Februari 2025.
- ^ a b c d e f "Semangat Toleransi di Tengah Keramaian Pasar Wadai Ramadan Banjarmasin". Liputan 6. 7 Juni 2018. Diakses tanggal 26 Februari 2025.
- ^ Hanum, Zubaedah (23 Maret 2023). "Hanya Ada Saat Ramadan, Ini Keunikan Pasar Wadai di Kalimantan Selatan". Media Indonesia. Diakses tanggal 26 Februari 2025.
- ^ Auliana (26 Februari 2025). "Wadai Khas Banjar, Menu Pilihan saat Berbuka". Radio Republik Indonesia (RRI). Diakses tanggal 26 Februari 2025.