Nastar

Wadai Nastar

Nastar marupakan wadai karing nang diulah matan galapung gandum, mantiga,lawan hintalu nang diisi lawan salai nanas, cuklat, atawa rasa lainnya. Asal katanya matan bahasa Walanda ananas lawan taart. Bantuk wadai nginih bulat-bulat lawan diamitir kira-kira 2 cm. Salain babantuk bulat, kudapan ngini jua sudah baisi bamacam-macam bantuk kaya bantuk daun, labu, katupat, gulung, lawan bantuk landak. Biasanya bagian atas nastar dihiasi lawan cancangan halus kismis atawa cangkih.

Sajarah Wadai Nastar

Wadai nastar lain wadai asli Indunisia. Wadai nangini asalnya matan nagara kincir angin, Walanda. Ngaran nastar marupakan gabungan matan bahasa Walanda ananas nang baarti nanas wan taartjes atawa tart nang baarti wadai. Risip nastar diilhami dari ulahan pai ala Walanda nang diulah dalam luyang-luyang ganal lawan isian barupa salai blueberry, apal juwa strubiri. Dahulu, pas urang Walanda datang ka Nusantara, bubuhannya handak maulah kue nangkaya itu.Tapi, urang-urang tu ngalih mancari blueberry, strubiri, lawan apal nang mahirip buah nang baada di tanah Walanda. Sabagai pangganti, timbul akal gasan mangganti buah-buahan ngitu lawan buah nang mudah ditamui di tanah air yaitu nanas. Salain labih mudah didapat buah nanas jua dipilih karana citarasa nanas nang asam, manis lawan sigar mahirip lawan citarasa nang ada di buah strubirii lawan apal.

Cara Maulah Wadai Nastar

Cara maulah wadai nastar

1. Masukakan mantiga, margarin, lawan gula halus ka dalam wadah. Imbah tu kucuk lawan mixer salama dua menit.
2. Masukakan 2 bigi kuning kuning hintalu, dimasukakan sabuting sabuting sacara bagantian, habistu kucuk lagi
3. Masukakan galapung maizina, galapung gandum, lawan susu bubuk di wadah lain, campur sampai rata
4. Tuang sadikit sadikit galapung nang sudah dicampur tadi ka dalam adunan panambaian. Kucuk lawan wancuh sampai rata.
5. Tuang kiju parut, aduk sampai rata.
6. Imbah adunan jadi, bantuk adunan lawan bantuk bulat
7. Pipihakan sadikit imbahtu isi lawan salai nanas, bantuk bulat lagi
8. Uliskan luyang lawan mantiga
9. Andak nastar nang sudah di bantuk pada luyang
10. Masukakan ka dalam panggangan pada suhu 150 darajat C salama15 manit haja.
11. Pahadangan manunggui nastar nang dipanggang, campurakan susu cair, madu,lawan 2 bigi kuning hintalu dalam wadah sampai rata.
12. Imbah 15 menit, kaluarakan nastar matan panggangan.
13. Lapisi atas nastar lawan lawan bahan nang sudah diulah.
14. Tambahkan kiju parut.
15. Masukakan nastar ka dalam panggangan lalu panggang sampai matang.
16. Imbah masak, kaluarakan matan panggangan, dinginakan
17. Wadai karing nastar kiju salai nanas siap dihidangakan.