Musium Makam Sultan Suriansyah
Musium Makam Sultan Suriansyah yatu salah sabuting dari musium nang ada di Kuta Banjarmasin, Propinsi Kalimantan Selatan. Bangunan musium ngini yatu bagian dari kumplik pamakaman Sultan Suriansyah lawan sang ratu. Makam lawan bangunan musium ngitu wahini jadi ubjik wisata reliji nang kawa didatangi ulih rakyat biasa.[1] Sultan Suriansyah nitu Raja Banjar paawalan nang masuk agama islam.[2] Galar Sultan Suriansyah baasal dari kata surya, nang baarti matahari, wan syah, nang baarti raja. Galar ngini disasuaikan wan galar Raden Putra, yang banama Rahadyan Putra Suryanata, di mana nata jua baarti raja. Suryanata sandiri yatu tokoh nang dianggap sabagai pandiri dinasti pas masa karajaan Hindu sabalum masuk Islam di Kesultanan Banjar.[3]
Lokasi
[babak | babak asal-mulanya]Musium makam Sultan Suriansyah batampat di Jalan Kuin Utara, Kalurahan Kuin Utara, Kacamatan Banjarmasin Utara, Kuta Banjarmasin, Propinsi Kalimantan Selatan. Bangunan musium ini baandak pas di higa lawang kumpliks makam Raja Banjar.[4] Musium nang sakumpliks lawan Makam sultan ini jua baandak di pinggir Sungai Barito nang salah sabuting sungai taganal wan tapanjang di Kalimantan Selatan.[5]
Bangunan musium
[babak | babak asal-mulanya]Bangunan Musium makam Sultan Suriansyah baisi disen atawa bantukan nangkaya rumah banjar, rumah tradisional di Kalimantan Selatan, nang diandaki corak bawarna kuning wan hijau. Bangunan musium ini kasaluruhan tabuat dari kayu ulin.[4] Kayu ulin sorang marupakan jenis kayu nang baisi daya tahan nang kuat dari macam kundisi lingkungan sahingga disambat sebagai kayu besi dari Kalimantan Selatan.[6]
Isian museum
[babak | babak asal-mulanya]Museum makam sultan Suriansyah baisi barbagai macam isi atawa banda paninggalan Raja Banjar, saparti parang nabur banjar, keris, kain tatamba, azimat perkasih wan nang lainnya. Selain nitu ada jua bamacam pacahan banda paninggalan nang lain, kaya batu bata, cangkir bahari, piring bahari, kendi-kendi dari tanah liat wan nang lainnya. Pacahan banda nitu didapatakan di babarapa rumah sakitaran kumplik makam sultan. Di ruang tangah musium ini tadapat jua sebuting lukisan asli wajah Raja Banjar paawalan yaitu Sultan Suriansyah.[4]
Referensi
[babak | babak asal-mulanya]- ↑ IPS, JENDELA (2023-08-16). "Makam Sultan Suriansyah Raja Banjar Pertama, Sebagai Objek Wisata Relegi". JENDELA IPS (dalam bahasa Indonesia). Diarsipkan dari versi asli tanggal 2024-05-18. Diakses tanggal 2024-05-18.
- ↑ "Museum Makam Sultan Suriansyah". museum.co.id (dalam bahasa Inggris). Diakses tanggal 2024-05-18.
- ↑ Syarifuddin, M. "Islamnya Pangeran Sultan Suriansyah - Radar Banjarmasin". Islamnya Pangeran Sultan Suriansyah - Radar Banjarmasin (dalam bahasa Indonesia). Diakses tanggal 2025-03-09.
- 1 2 3 "Di Museum Sultan Suriansyah Banjarmasin, Tersimpan Benda Peninggalan Raja Banjar". Banjarmasinpost.co.id (dalam bahasa Indonesia). Diakses tanggal 2024-05-18.
- ↑ "Sungai Barito: Sungai Terbesar dan Terpanjang di Kalimantan Selatan – Blog UI An Nur Lampung" (dalam bahasa Indonesia). 2023-11-05. Diakses tanggal 2024-05-18.
- ↑ Media, Kompas Cyber (2022-11-09). "Mengenal Kayu Ulin, Kayu Besi dari Kalimantan yang Kuat dan Antirayap Halaman all". KOMPAS.com (dalam bahasa Indonesia). Diakses tanggal 2024-05-18.