Musium Bali

Musium Bali
	Hadap muka Musium Bali
	Lua error in Modul:Location_map at line 539: Tidak dapat menemukan definisi peta lokasi yang ditentukan. Baik "Modul:Location map/data/Indonesia_Denpasar" maupun "Templat:Location map Indonesia_Denpasar" tidak ada.
Didirikan	1931
Lokasi	Jl. Mayor Wisnu, Kelurahan Br. Abasan,Denpasar, Bali
Koordinat	8°39′27″S 115°13′6.7″E / 8.6575°LS 115.218528°BTKoordinat: 8°39′27″S 115°13′6.7″E / 8.6575°LS 115.218528°BT

Musium Bali (patuh jua disambat Musium Unit Palaksana Tiknis Dinas Kabudayaan Bali) yaitu musium nagara nang baandak di Kuta Denpasar, Bali. Musium Bali jadi musium gasan manyimpan paninggalan jaman bahari manusia wan etnografi.

Galambang musium ngini matan banda-banda etnografi, antara lain paralawan wan parlangkapan sehari-hari, kasanian, agama, bahasa tulisan, wan lainnya nang malihatakan kahidupan wan parkambangan budaya Bali wayah bahari.

Sajarah pambangunan

Kahandak mambangun Musium Bali asalnya tumatan Th. A. Resink. Inya mausulakan gasan mambangun sebuting wadah gasan malindungi wan malastariakan banda-banda kabudayaan di Pulau Bali. Kahandak ngini ditarima ulih W.F.J. Kroon nang imbahtu mambangun musium etnografi pas tahun 1910.^[2] Kroon nitu Asistin Residensi Bali Salatan. Wayah jabatan sidin mulai tahun 1909 sampai 1913, wan wilayah gawiannya di Denpasar. Salain nitu, Kroon jua bagawi jadi arsitik.

Kahandak sidin jadi kanyataan pas dibangun sabuting bangunan nang dipinandui sabagai Gedung Arca tahun 1910. Arsitiknya yaitu I Gusti Agung Ketut Kandel tumatan banjar Abasan, wan I Gusti Ketut Rai matan banjar Belong, lawan jua arsitik tumatan Jerman Curt Grundler. Pandanaan wan bahan bangunannya disadiakan ulih raja-raja tumatan Buleleng, Tabanan, Badung wan Karangasem.

W.F. Sttuterhim, Kapala Dinas Purbakala handak manarusakan malangkapi musium lawan paninggalan etnografi pas tahun 1930. Hagan malancarakan gawian nitu, dibantuk sabuah yayasan nang dipimpin ulih H.R. Ha'ak, panulis G.J Grader, bandahara G.M. Hendrikss, wan angguta nang lain; R. Goris, I Gusti Ngurah Alit (raja Badung), I Gusti Bagus Negara, wan Walter Spies.

Wayah tanggal 8 Disimbir 1932, Musium Bali mulai dibuka gasan umum.^[3] Hari nitu jua dijadiakan gasan marasmiakan yayasan musium. Bangunan Tabanan, Bangunan Karangasem wan Bangunan Buleleng dibuka gasan pamiran tatap, nang baisi kuliksi banda prasajarah, sajarah, etnografi, tamasuk jua sani rupa.

Musium ngini diambil alih ulih pamarintah dairah Prupinsi Bali, lantaran kaadaannya masih saraba hanyar, wan rahat ada parang National Interscholastic Cycling Association (NICA) wan Japang, imbahtu pas tanggal 5 Januari 1965 dijulung ka pamarintah pusat di bawah Dapartimin Pandidikan wan Budaya, diulah jadi musium umum prupinsi wan ngarannya diubah jadi Musium Negeri Provinsi Bali.

Tumatan tahun 1969, pamarintah pusat mambari pahatian labih gasan musium-musium ampun prupinsi, tamasuk Musium Bali. Wayah Pambangunan Lima Tahun (PELITA), Musium Bali bulih dibabak wan manambah bangunan ka ampah salatan, nang dipungsiakan jadi parpustakaan, auditorium, laboratorium konservasi, bangunan kukumpulan, wadah pamiran, wan kantur, sahingga luas musium sabukuan sampai wayah ini 600 m2 wan ada 9 bangunan. Tumatan ada utunumi dairah tahun 2000, Musium Negeri Provinsi Bali dijulung pulang ka Pamarintah Prupinsi Bali jadi Unit Pelaksana Teknis Dinas Kebudayaan (UPTD) Provinsi Bali, nang bangaran UPTD Museum Bali.

Bangunan

Tawing, halaman, wan lawang diulah pakai gaya has istana atawa karajaan di Denpasar. Ada ampat papiliun di himpunan musium. Papiliun ngini mawakili bamacam-macam kabupatin di Bali.

Ampah utara ada papiliun Tabanan. Kumpulan nang ditampaiakan yaitu pakakas tarian nangkaya baju gasan manari, samunyaan janis tuping gasan Tari Topeng, wayang kulit, karis (padang tradisiunal Bali) gasan Tari Calonarang, wan jua ada patung bahari. Kumpulan lain nang ada jua di UPTD Musium Bali yaitu biologi, etnografi, arkeologi, sajarah, <i>numismatika</i>, filologi, karamik, wan sani rupa.

Di tangah himpunan nitu ada Papiliun Buleleng. Bangunan ngini baisi gaya has Pura di utara Bali. Anjungan ngini baisi kumpulan pakaian Bali, tamasuk kipas tradisiunal Bali.

Papiliun Badung andakannya di lawang parak bale kulkul nang tinggi manjulang (pakakas tradisiunal gasan mangumpulakan urang), wan macam-macam kumpulan prasajarah nang lain. Di papiliun ngini, kawa ditingau pakakas nang dipakai manusia wayah masih mamburu wan batanam, wayah budidaya, wan wayah batampa. Di lantai atas papiliun ngini ada kumpulan sani rupa Bali. Musium Bali jadi wadah nang baik gasan balajar labih banyak parihal Bali.

Andakan

Musium Bali andakannya di kumpulan nang rami di pusat kuta Denpasar, pasnya di jalan Mayor Wisnu. Di ampah salatan musium ada Pura Jagatnatha, tagal lapangan Puputan Badung wan Patung Empat Wajah (Patung Catur Muka) ada di hadapan Musium Bali. Amun mamakai mutur, jarak bajalanan ka Musium Bali parlu waktu sakitar 45 manit, sakitar 13 km bajalan matan Bandara Ngurah Rai.

Gambar

Jujuhutan

↑ "DAFTAR MUSEUM KEBUDAYAAN PER KEC. Denpasar Timur". Pusdatin Kementerian Pendidikan Dasar dan Menengah. Diakses tanggal 2025-06-01.
↑ Rusmiyati, dkk. (2018). Katalog Museum Indonesia Jilid II (PDF). Direktorat Pelestarian Cagar Budaya dan Permuseuman. hlm. 212. ISBN 978-979-8250-67-5.
↑ Syarifuddin, dkk. (Februari 2023). Koleksi Museum Negeri Sumatera Selatan (PDF). Palembang: Bening Media Publishing. hlm. 2. ISBN 978-623-8006-53-3. Diarsipkan dari versi asli (PDF) tanggal 2023-06-02. Diakses tanggal 2025-05-11.

[1] "DAFTAR MUSEUM KEBUDAYAAN PER KEC. Denpasar Timur". Pusdatin Kementerian Pendidikan Dasar dan Menengah. Diakses tanggal 2025-06-01.

[2] Rusmiyati, dkk. (2018). Katalog Museum Indonesia Jilid II (PDF). Direktorat Pelestarian Cagar Budaya dan Permuseuman. hlm. 212. ISBN 978-979-8250-67-5.

[3] Syarifuddin, dkk. (Februari 2023). Koleksi Museum Negeri Sumatera Selatan (PDF). Palembang: Bening Media Publishing. hlm. 2. ISBN 978-623-8006-53-3. Diarsipkan dari versi asli (PDF) tanggal 2023-06-02. Diakses tanggal 2025-05-11.

[1]

[2]

[3]