Capil ka isi

Mudik

Tumatan Wikipidia Banjar, kindai pangatahuan
Urang mudik pakai sapida mutur

Mudik ngini artinya bulik, babulik kampung[1], balayar, bulik ka hulu sungai atawa padalaman.[2] Ngini ialah gawian buhan nang madam atawa tulak marantau nang handak bulik ka kampung halaman.[3]

Mudik di Indunisia ngini biasanya jadi tradisi tahunan di parak hari-hari kaagamaan, nang kaya parak Idul Fitri, Idul Adha, Natal, & Tahun Baru wan hari parai nasiunal. Karancakannya nang Hari Raya Pitrah atawa Hari Raya Haji ngini biasanya banyak bubuhan Banjar bakumpulan di rumah nang paling tuha di kulawarga sagan basasaliman atawa sungkiman, jiarah, wan manjaga tradisi wan budaya.[4] Barbagai transpurtasi nang kawa dipakai gasan gawian mudik ngini, antara lain kapal tarabang, karita api, kapal laut, bis, jua kandaraan saurang, kaya mubil wan sapida mutur, truk, bajaj.[5]

Istilah, Sajarah, wan Makna Mudik

[babak | babak asal-mulanya]

Kuya "mudik" baasal matan basa Jawa bahari mudik, matan kuya "udik" nang baarti naik, maju (bajalan) ka hulu, manuju ka darat, nang mana kuya "udik" saurang baasal matan akar basa Prutu-Malayu-Indunisia. Jaka dalam basa Malayu, mudik matan kuya "udik" nang baarti disa atawa dusun.[6]

Wayah jaman bahari, masarakat Malayu nang bagana wan badiam di hulu sungai rancak tulakan ka hilir sungai mamakai kapal, lalu bulik lagi ka disa. Wayah urang-urang mula'i marantau ka kuta, kuya "mudik" mula'i dikanal wan dipartahanakan sampai wayahini.[7] Wayah jaman bahari jua, sabalum di Jakarta tajadi urbanisasi ganal-ganalan, masih banyak wilayah nang bangaran "ahir udik" atawa "ilir" (utara atawa hilir) wan kabanyakan ahiran ngitu diganti lawan kuya Malayu salatan atawa utara. Cuntuhnya, Meruya Udik, Meruya Ilir, Sukabumi Udik, Sukabumi Ilir.[8]

Pas wayah Jakarta masih bangaran Batavia, suplai hasil bumi dairah kuta Batavia diambil matan wilayah-wilayah di luar tawing kuta di salatan. Karana ngitu, ada ngaran wilayah Jakarta nang tarait lawan tumbuhan, kaya Kebon Jeruk, Kebon Kopi, Kebon Nanas, Kemanggisan, Duren Kalibata. Bubuhan patani wan padagang hasil bumi ngitu mambawa dagangannya liwat sungai. Matan situlah cungul istilah hilir-mudik, nang baarti sama lawan bulak-balik. Mudik atawa manuju udik wayah bulik matan kuta bulik ka ladangnya, kaitu tarus baulang-ulang.[9][10][11]

Tadapat jua tiuri nang manyambatakan, asal kuya "mudik" baasal matan akrunim dua kuya dalam basa Jawa, yaitu mulih dilik atawa mulih dhisik nang baarti "bulik dahulu", atawa "bulik satumat".[12][13] Biar balum dapat dipastiakan kabujurannya, tapi tiuri ngini cukup baridar luas, labihnya di masarakat pulau Jawa.[14] Wayah jaman bahari, masarakat Jawa mamakai istilah ngini gasan manggambarakan parjalanan matan dairah hilir (kuta atawa pasisir, pinggiran) manuju dairah hulu (disa atawa kampung halaman).[4]

Jaka maknanya, mudik ngini gasan mambulikakan sumangat kampung nang idintik lawan gutung ruyung, kasatiakawalan, kabarsahajaan, wan badangsanakan gasan dibawa lagi jaka bubuhan pamudik babulik ka masarakat nang mana bubuhannya bagana wan badiam di situ.[15] Jua mudik ngini kawa digambarakan lawan parjalanan buliknya manusia lawan Tuhan, marupakan spirit nang harus diparhatiakan. Tujuannya supaya pamudik kawa maambil hikmah matan saban paristiwa salawas dalam parjalanan matan kuta ka disa.[16]

Mudik ngini mumintum baharga gasan malapas kaganangan lawan kulawarga wan dangsanak sabarataan di kampung halaman. Gasan banyak urang, mudik ialah cara gasan babulik ka akar, maingati asalnya, wan marayakan basamaan lawan urang-urang nang disayang. Tradisi ngini jua jadi paingat akan pantingnya manjaga hubungan kakulawargaan wan budaya.[7] Kawa jua mudik ngini sawagai sarana rikriasi wan hiburan, kaya maitihi pamandangan alam, maicipi kulinir di sapanjang parjalanan, atawa bastup di tampat-tampat manarik nang jadi hiburan saurang sakalian istirahat matan gawian wan aktipitas kasaharian.[17]

Tantangan Angkutan Mudik

[babak | babak asal-mulanya]

Baratan nang ngalih banar dihadap dalam mudik ialah panyadiaan sistim transpurtasi karana basamaan jumlah masarakat mamakai angkutan umum atawa kandaraan lalui jaringan jalan nang ada sampai rancak maakibatakan panumpang atawa pamakai parjalanan mahadap kamacitan, panundaan parjalanan. Mubil, mutur, karita api, kapal tarbang, wan bis antarkuta jadi transpurtasi nang banyak banar dipakai gasan mudik labaran.[5]

Mudik di Indunisia

[babak | babak asal-mulanya]

Mudik Urang Banjar

[babak | babak asal-mulanya]

Lawan urang Banjar, mudik ngitu artinya babulik kawa wadah padatuan bahari atawa wadah kalahiran surang. Mudik ngini biasanya rami pas Hari Raya Pitrah. Buhan nang bagawi di kuta-kuta ganal rancaknya bulik ka kampung atawa wadahnya diranakakan satahun sakali pas hari raya.

Tradisi mudik ngini bakaitan lawan tradisi Madam ulih bubuhan Banjar. [18] Bubuhan Banjar jua manyambat mudik ngitu sagan parjalanan ka Hulu Sungai, yaitu Hulu Sungai Salatan (Kandangan), Hulu Sungai Tangah (Barabai), atawa Hulu Sungai Utara (Amuntai). Ngini disababakan banyak bubuhan Banjar nang matan atawa baisi juriat di Banua Lima.

Jajuhutan

[babak | babak asal-mulanya]
  1. ↑ "Hasil Pencarian - KBBI Daring". kbbi.kemdikbud.go.id. Diarsipkan dari versi asli tanggal 2023-04-18. Diakses tanggal 2026-03-04.
  2. ↑ "Mudik Artinya ke Hulu, THR Artinya Penghasilan". Direktorat Jenderal Pajak (dalam bahasa Indonesia). Diakses tanggal 2026-03-04.
  3. ↑ "Arti kata mudik - Kamus Besar Bahasa Indonesia (KBBI) Online". kbbi.web.id. Diakses tanggal 2026-02-19.
  4. 1 2 "Tahukah Kamu? Begini Sejarah Istilah Mudik yang Selalu Ramai Jelang Hari Raya Idulfitri". KPU Kab Nduga. 2026-01-08. Diakses tanggal 2026-03-04.
  5. 1 2 "Jumlah Angkutan Penumpang Umum di Semua Moda Kembali Mengalami Peningkatan pada H+1 Lebaran - Direktorat Jenderal Perhubungan Darat". hubdat.dephub.go.id. Diakses tanggal 2026-03-04.
  6. ↑ "Ini Bedanya Mudik dan Pulang Kampung Menurut Ahli Bahasa". kumparan (dalam bahasa Indonesia). Diakses tanggal 2026-03-04.
  7. 1 2 Amalina, Rizky (2025-03-24). "Mudik: Tradisi Pulang Kampung yang Melekat di Budaya Indonesia". UNESA: Universitas Negeri Surabaya. Diakses tanggal 2026-03-04.
  8. ↑ Zaenuddin, Zidane, M., M. (2012). Asal-Usul Djakarta Tempo Doeloe: Disertai Fakta, Foto, dan Kesaksian Unik yang Membawa Anda ke Masa Lalu. Ufuk Press. hlm. 212.
  9. ↑ Saidi, R. (1997). Profil Orang Betawi: Asal Muasal, Kebudayaan, dan Adat Istiadatnya. Gunara Kata.
  10. ↑ Shahab, A. (2004). Saudagar Baghdad dari Betawi. Penerbit Republika.
  11. ↑ Avira, Pritania. "Tradisi Mudik Lebaran: Sejarah Dan Asal Usulnya". Tokopedia. Diakses tanggal 2026-03-04.[permanent dead link]
  12. ↑ "Arti dan Kepanjangan Mudik Serta Sejarahnya di Indonesia". sahabat.pegadaian.co.id (dalam bahasa Indonesia). Diakses tanggal 2026-03-04.
  13. ↑ Isdarmadji, Ngungrum Qurani (2019-06-04). "Mudik, Asal Usul hingga Kebijakan Pemerintah". Kementerian Pendayagunaan Aparatur Negara dan Reformasi Birokrasi (dalam bahasa Indonesia). Diakses tanggal 2026-03-04.
  14. ↑ Arnani, Azanella, Wedhaswary, Mela, Luthfia Ayu, Inggried Dwi (2018-06-7). "Mudik, "Mulih Dhisik", Kembali ke Udik..." Kompas.com. Diakses tanggal 2026-03-04.
  15. ↑ "Mudik, Perjalanan Spiritual Sarat Makna | Fakultas Ilmu Tarbiyah dan Keguruan Universitas Islam Negeri Syarif Hidayatullah". fitk.uinjkt.ac.id (dalam bahasa Indonesia). Diakses tanggal 2026-03-04.
  16. ↑ el-Saha, M. Ishom (2024-04-03). "Mudik dan Memahami Makna "Kembali"". Kemenag. Diakses tanggal 2026-03-04.
  17. ↑ "Makna di Balik Tradisi Mudik yang Selalu Dinanti". www.banksinarmas.com (dalam bahasa Indonesia). Diakses tanggal 2026-03-04.
  18. ↑ Hakim, Arif Rahman (2023-04-01). "Madam dan Jarwa: Tradisi Migrasi dan Pergulatan Identitas Urang Banjar".
Dijumput matan "https://bjn.wikipedia.org/w/index.php?title=Mudik&oldid=110032"