Masigit Pusaka Nurul Iman

Masjid Pusaka Nurul Iman yaitu masigit basajarah nang baandak di Kabupatin Tabalong, Prupinsi Kalimantan Selatan, Indunisia. Masigit ngini salah satu situs cagar budaya di Kabupatin Tabalong wan manjadi saksi awal syiar agama Islam di wilayah padalaman Tabalong. Masigit ngini baraitan lawan urang bapangaruh bangaran Datu Puain atawa Datu Ranggama, nang dipinandui sabagai salah satu urang nang manyiarakan agama Islam di kawasan itu.

Riwayat masigit ngini baraitan lawan ampat urang Dayak nang bagana di Banua Usang (damini kampung Puain Kanan) wayah awal abad ka-17, yaitu Datu Ranggama (Datu Puain), Datu Ugap, Datu Siti Marhaji, wan Datu Lambung Mangkurat. Wayah masa pamarintahan Raja Banjar Pangeran Suriansyah, Khatib Dayan datang ka wilayah itu wan manyaru warga di kampung itu gasan ba-Islam. Talu matan urang itu manarima saruan wan basurah syahadat di bawah puhun tiwadak, pahadangan Datu Lambung Mangkurat mamilih maninggalakan kampung. Imbah masuk Islam, talu urang itu manyiarakan ajaran Islam ka babagai kampung di Tabalong, Kalimantan Timur, wan Kalimantan Tangah. Wayah tahun 1638, buhannya mambangun sabuting masigit gasan wadah sumbahyang bajamaah. Pambangunan dimulai lawan mandiriakan tihang guru wayah malam Kamis nang dihadiri Khatib Dayan, wan masigit itu kawa dipakai gasan sumbahyang Jumahat isuknya.