Masigit Jami Sungai Banar
Masigit Jami Sungai Banar yaitu salah sabuting masigit paling tuha di Kalimantan Salatan. Andakannya di pinggir Sungai Negara yaitu Sungai Banar. Jaraknya sekitar 3 kilomitir matan Amuntai, kabupatin Hulu Sungai Utara. Secara administratif masigit ngini ada di kampung Jarang Kuantan, kacamatan Amuntai Salatan.[1]
Masigit ngini dinobatkan jadi masigit paling tuha maraga dibangun pas tahun 1804. Bangunannya berbahan beton, didominasi lawan kelir putih wan beberapa aksen biru anum di beberapa bagian nang kaya pagar wan jendela. Kubah masigit ngini warnanya hijau.[1]
Asal usul ngaran
[babak | babak asal-mulanya]Imbah tuntung pembangunan masigit, ada pedagang nang singgah ka masigit gasan sembahyang. Pedagang ngini pakai kelotok dan meulah urang sana himung maraga inya urang penambaian matan daerah lain. Imbah sembahyang inya menarusakan bejalan bekelotok tapi kadut duitnya tatinggal di masigit. Kadada nang wani menjapai kadut ngitu, malah urang begantian menjagai sekira kada hilang.[2]
Pas pedagang ngitu datang pulang, inya melihat kadut duitnya masih ada, bahkan imbah dicek sekalinya isinya masih sama kadada bakurang. Pedagang ngini basyukur banar dan menyambat urang di kampung ngini kadada nang culasnya. Imbah itu inya betakun ngaran sungai nang dilalui lawan masigitnya apa, tapi kadada nang kawa menjawab maraga balum bangaran.[2]
Maraga kadada nang tahunya ngaran sungai wan masigit ngini, akhirnya pedagang tadi mengarani sungai ngitu jadi Sungai Banar. Sedangkan masigitnya dingarani Masigit Sungai Banar. Mulai dari situ masigit ngini dingarani jadi Masigit Sungai Banar.[2]
Ulama nang suah maisi pangajian
[babak | babak asal-mulanya]Ulama nang biasa maisi pangajian di masigit, rumah-rumah wan musalla diantaranya ada Tuan Guru H. Abdul Qadir (lahir tahun 1830), Tuan Guru H. Ahmad (lahir sekitar tahun 1860 meninggal sekitar tahun 1944) bin H. Abdul Qadir. Ada jua Tuan Guru H. Amad atawa rancak disambat H. Ahmad Khatib (lahir 1866 meninggal 1956) bin Muhammad Arif. Ada jua Tuan Guru H. Abdul Hamid atawa biasa dikiyau Tuan Guru H. Putih (lahir 1870 wan wafat tahun 1940) bin Matsaleh. Ada Tuan Guru H. Abdul Hamid (lahir tahun 1896 wan meninggal 1951) bin H. Jamaluddin. Seberataan ulama nang disambat ngitu diranakakan di sekitar Sungai Banar.[2]
Bahan acuan
[babak | babak asal-mulanya]- 1 2 Arief. "Dibangun atas Saran Datuk Kelampaian - Radar Banjarmasin". Dibangun atas Saran Datuk Kelampaian - Radar Banjarmasin (dalam bahasa Indonesia). Diakses tanggal 2025-03-13.
- 1 2 3 4 Arief. "Kiprah Ulama dan Dahsyatnya 'Pasukan Gaib' - Radar Banjarmasin". Kiprah Ulama dan Dahsyatnya 'Pasukan Gaib' - Radar Banjarmasin (dalam bahasa Indonesia). Diakses tanggal 2025-03-13.