Masakan Iran
Masakan Iran atawa Masakan Parsia (basa Parsia: آشپزی ایرانی) iyalah gaya bamasak tradisional atawa mudirin nang tiba matan Iran (atawa dipinandui juwa lawan ngaran Parsia). Di Timur Tangah wan Asia Barat, gaya bamasak Iran inya unik, maraga baisi sajarah panjang, wan sing bapangaruh lawan budaya di wilayah paparakannya nang suah dikuasai lawan Kakaisaran Parsia. Hususnya gaya bamasak Iran bahubungan lawan sapalih gaya bamasak nagara paparakannya, nangkaya Azerbaijan, Turki, kaukasus, Kurdi, Irak, Levant, Yunani, Masakan Asia Tangah, wan saikit lawan Rusia.[1][2][3][4]
Masakan Parsia mahirip wan bahubungan rakat lawan juwa tapangaruhi lawan masakan Turki, Kaukasus, wan Azerbaijan, marga wilayahnya baparakan wan tarait kulaan bangsa (bubuhan Azerbaijan iyalah urang pambanyaknya kadua di Iran imbah urang Parsia). Aspek sajarah juwa bapangaruhi, marga kawasan ngini suah disatuakan lawan kakaisaran tartantu, nangkaya Achaemenid, Sasanian, Seljuk, Safawiyah, Afsharid, Utsmaniyah wan Qajar.
Sayuran sigar wan rarampah banyak tapakai dalam Masakan Iran, tamasuk bubuahan kaya anggur, plum, dalima, quince, prun, aprikot, wan kismis. Masakan has Parsia rancak nitu iya kambuhan matan nasi lawan daging, kaya daging kambing, hayam, atawa iwak, wan sayuran nangkaya bawang, bamamacam bumbu, wan kacang. Sakira tadapat rasa nang pas, rancak nitu urang Iran manambahiakan rarampah nangkaya saffron, limau karing, kayu manis, wan daun parsley, nang barataan dimasukakan tagal sasuai takaran masing-masing.
Masakan nasiunal
[babak | babak asal-mulanya]
Masakan Iran baisi parian banyak; nangkaya chelow kabab (nasi bakambuh daging babanam: barg, kubidah, jujah, sislik, soltani, chenjeh), kuris (nangkaya semur daging dimakan lawan nasi Irani: gurmih sabji, gaimah, fesenjān, dll.), āsh (sup likat: nangkaya āsh-e anār), kuku (souffle sayuran), pilap (nasi putih batambah daging, sayuran, wan rarampah, tamasuk loobia polo, albaloo polo, sabzi polo, zereshk, baghali polo salad, wan lainnya), lawan juwa bamamacam salad, ruti, wadai, wan minuman nang wastu ada di sapalih wilayah di Iran. Ada juwa banyak macam puluran, masakan pambuka, wan wadai pambasuh muntung has Iran.
Jujuhutan
[babak | babak asal-mulanya]- ↑ M. Price, , 2001, Persian Cuisine, a Brief History
- ↑ B. Fragner, ĀŠPAZĪ, in Encyclopaedia Iranica, 1987, ret. August 2012 from the online edition
- ↑ "Iranian Food". Diarsipkan dari versi asli tanggal 2014-04-14. Diakses tanggal 13 April 2014.
- ↑ "Culture of IRAN". Diakses tanggal 13 April 2014.