Lahung
Lahung (Durio dulcis) marupakan salah satu buah eksotis nang barasal matan dari Kalimantan, Indunesia.[1] Buah ngini mahirip lawan durian nang tamasuk sabagai tumbuhan endemik nang langka di habitat bujurnya.[2] Lahung babantuk mahirip durian, tatapi nang mambeda akannya dari warna kulitnya nang habang sampai warna ungu tuha sarta durinya yang labih halus, tajam, wan rapat. Buah ngini baunya taramat kuat, sasampai malabihi manyangat baunya durian. Daging buahnya bawarna oren sampai bawarna habang hati lawan batekstur lambut wan rasanya manis banar tapi ada sadikit masamnya, rasanya manyarupai karamil nang rasanya labih hampul. Katika buahnya masak sabijian, buah ngini batekstur nang lambut.
Karakteristik
[babak | babak asal-mulanya]Lahung tumbuh sabagai pohon nang ganal wan batang nya babantuk silindris nang mancapai tinggi labih 40 mitir. Daunnya babantuk mamanjang wan hujungnya maruncing, sarta pangkalnya nang tumpul. Parmukaan atas daunnya mancilang, bagian bawahnya bawarna coklat anum. Tangkai daunnya babantuk bulat wan bawarna kuning kacuklatan. Lahung tumbuh di hutan hujan tarupis nang curah hujannya lebih 2.000 mm par tahun wan tingginya 20 hinggan 800 meter. Tanaman ngini mamarluakan tanah nang subur agar kawa tumbuh bagus. Lahung baisi siklus partumbuhan nang panjang wan mamarlu akan waktu batahun-tahun sabalum babuah.
Manfaat
[babak | babak asal-mulanya]Buah lahung ada tadapat mangandung gizi nang tinggi wan baragam manfaat kasihatan. Buah ngini baparan panting dalam manjaga kasihatan kulit, maningkat akan daya tahan tubuh, lawan malindungi sel-sel awak dari karusakan bakas radikal bebas. Lahung baisi alkaloid harmane, dapat maningkat akan takanan darah. Maka dari ngintu, buah ngini bamanfaat hagan pandarita takanan darah randah, tapi baiknya di pakai dangan bijak oleh urang hipertensi. Salain ngintu, kandungan gula alaminya nang tinggi manjadi akan energi hagan di awak.
Nilai Ekonomi wan Budaya
[babak | babak asal-mulanya]Maskipun baisi rasa nang khas, buah lahung balum baisi nilai ekonomi satinggi duirian komersial. Salah satu alasannya karana rasio daging buah nang labih sadikit dibanding akan lawan ukuran kulitnya nang kandal.[3]
Di dalam budaya urang Dayak, lahung baisi nilai simbiolis dalam upacara adat wan rancak dipakai sabagai lambang kasuburan wan kabaruntungan. Sacara tradisional, bagian nang lain dari pohon lahung jua dimanfaat akan. Banyu bajarang nang kulit batangnya dipakai hagan maubati sariawan wan diare, tatapi rabusan bunganya diparcayai bisa manurun akan awak ladar. Kayu pohon lahung tarkanal kualitasnya nang tinggi wan rancak di pakai hagan bahan bangunan.[4] Kayunya kuat wan awit manjadiakan bahan yang dikatijui dalam industri pakayuan, maskipun pamanfaatan ngini umpat manyumbang tahadap kalangkaan di alam nang liar.
Ancaman wan Upaya
[babak | babak asal-mulanya]Jumlah lahung wayah ngini bamakin taancam, tabangan liar, wan manjadi lahan pahumaan. Hagan mancagah kapunahan, maka parlu cara nang labih tasusun. Pelestarian plasma nutfah lahung manjadi cara nang panting hagan manjaganya.
Referensi
[babak | babak asal-mulanya]- ↑ "Buah Lahung: Buah Eksotis Kalimantan Yang Patut Dicoba". kumparan (dalam bahasa Indonesia). Diakses tanggal 2025-03-08.
- ↑ Agustiningrum, Eka; Hardarani, Nofia; Susanti, Hilda (2023-06-04). "Teknik Sterilisasi Eksplan Daun Lahung (Durio dulcis) pada Media MS Secara In Vitro". AGROSCRIPT: Journal of Applied Agricultural Sciences. 5 (2): 65–80. doi:10.36423/agroscript.v5i2.1248. ISSN 2685-9491.
- ↑ satuharapan.com, PT Satu Harapan Media |. "Durian Lahung, Buah Unggulan Kalimantan - Satu Harapan". satuharapan.com (dalam bahasa Indonesia). Diarsipkan dari versi asli tanggal 2023-01-28. Diakses tanggal 2025-03-08.
- ↑ Hardarani, Nofia; Nisa, Chatimatun (2022-12-27). "Efektivitas Formulasi Sterilan terhadap Jenis Eksplan pada Kultur Durian Lahung (Durio dulcis)". Daun: Jurnal Ilmiah Pertanian dan Kehutanan. 9 (2): 161–176. doi:10.33084/daun.v9i2.4264. ISSN 2356-0320.