Kasyful Anwar

Tumatan Wikipidia Banjar, kindai pangatahuan
(Diugahakan matan Kasyful anwar)
Infobox orangKasyful Anwar
Riwayat
Kalahiran Martapura Edit nilai pada Wikidata
Kamatian 17 Nupimbir 1940 Edit nilai pada Wikidata (53 tahun (id) terjemahkan)
Martapura Edit nilai pada Wikidata
Agama (id) Terjemahkan Islam Edit nilai pada Wikidata
Gawian
Gawian Ulama (id) Terjemahkan Edit nilai pada Wikidata
Bagawi di Pondok Pesantren Darussalam Martapura (id) Terjemahkan (1922–1940) Edit nilai pada Wikidata
Ubah data ini di Wikidata

Syekh Muhammad Kasyful Anwar atawa nang dipinandui sabagai Tuan Guru Kasyful Anwar marupakan ulama Banjar yang suah mamimpin Punduk Darussalam Martapura wan jua manjadi urang nang mamugai sistim mudirin pandidikan madrasah nang ada di Kalimantan Selatan pada abad 19-20 masihi.

Tuan Guru Kasyful Anwar diranakakan di Kampung Malayu, Kacamatan Martapura Timur, Kabupatin Banjar, Kalimantan Salatan wayah tanggal 4 Rajap 1304 H/ 29 Maret 1887. Abahnya bangaran al-Allamah Guru Haji Ismail bin Muhammad Arsyad bin Muhammad Sholeh bin Badruddin bin Maulana Kamaluddin. Adapun umanya jua saturunan lawan abahnya maraga abahnya wan umanya kawin sapupuan[1]. Kulawarganya tumatan halus sudah hidup saraba bakacukupan, maraga kulawarganya tamasuk kalangan manangah.

Pandidikan[babak | babak asal-mulanya]

Guru Kasyful Anwar tumatan halus sudah hidup di bawah bimbingan kuitannya, nang mana kuitannya mangajarakan Al-Qur'an wan ilmu agama ka inya. Salain kulihan ilmu matan kuitannya saurang, inya jua tulak ka wadah tuan guru, langgar atawa masjid nang ada maadakan pambalajaran ilmu agama kaislaman.  Maraga wayah inya lagi halus masih kadada urang nang mambangun sakulahan atawa madrasah, jadi inya balajar matan mangaji duduk lawan guru-guru di kampung.

Pada tahun 1313 Hijriah, wayah inya baumur 9 tahun, inya tulakan ka Makkah lawan kuitannya sagan balajar nang mana inya balajar bahasa Arab lawan abahnya. Wayah inya baumur 11 tahun, abahnya habis umur di Makkah wan batabala di Mu’alla. Imbah itu bairingan jua lawan umanya wayah sidin umur 13 tahun. Maraga ngitu, inya digaduh ulih nini lawan kainya.[2]

Salawas bagana di Makkah, inya jua balajar lawan ulama nang barasal matan Kampung Pasayangan Martapura nang mana inya sudah lawas bagana di sana yaitu Syekh Muhammad Amin bin Qadi Haji Mahmud dan Asiah binti Syekh Muhammad Arsyad al Banjary. Lain pada ngitu,Tuan Guru Kasyful Anwar jua balajar ilmu agama di Masjidil Haram matan tahun 1313 sampai tahun 1330 Hijriah, nang mana inya bagana di Makkah kurang labih 17 tahun. Salawas ngitu, inya kawa manguasai ilmu tafsir, hadits, fiqih wan bahasa Arab. Bahka, inya jua maambil ijazah Dala’il al-Khayrat wan Burdah al-Mahdah al-Mubarakah matan Syekh Muhammad Yahya Abu Liman.[2]

Kiprah[babak | babak asal-mulanya]

Wayah baumur 26 tahun, yakni di tahun 1330 Hijriah, inya bulik ka Indunisia wan kawin lawan Siti Halimah bin Haji Ja’far. Matan parkawinannya ngini, buhannya kulihan anak 6 ikun, 2 babinian wan 4 lalakian.[3]

Maajar ilmu agama[babak | babak asal-mulanya]

Salawas bagana di kampung halaman, atas usulan matan babuhan kampung inya maajar lawan bubuhan masyarakat kampung di wadahnya. Pada tahun 1922 Masihi, inya ditawari maajar wan mamimpin Punduk Darussalam Martapura, nang mana asalnya matan Madrasah al-Imad fi Ta’lim al-Aulad Darussalam nang didiriakan ulih Guru Haji Jamaluddin , Guru Haji Gampau, Guru Haji Ibrahim Kadir, wan Guru Haji Abdurrahman pada tahun 14 Juni 1914.[4]

Salawas inya mamimpin punduk matan tahun 1922 sampai tahun 1940, sasar tahun sasar banyak santri nang handak umpat mamunduk. Maraga ngitu, inya maulah ruangan kalas sabanyak 16 buah sakira kawa manampung banyaknya murid, yakni tadiri atas dua tingkat (dalapan ruangan di bawah wan dalapan ruangan di atas). Lain pada ngitu, inya manarapakan tingkatan janjang pandidikan pada punduk, yakni tingkat Tahdiniyah (salawas 3 tahun), Ibtidayah  (salawas 3 tahun), wan Tsanawiyah (salawas 3 tahun), nang mana sabarataan diisi ulih bubuhan lalakian[5].

Sabujurnya pandidikan Islam  di Kalimantan Selatan sudah ada batingkatan, tagal hanya diitihi matan kitab nang dipalajari wan hanya sabatas liwat masjid, langgar atawa rumah-rumah.  Sadangkan dalam sistim pangajarannya, inya masih utama akan panguasaan ilmu-ilmu nahwu jdan sharaf.[6] Paparak abad-abad wayah ngini bahari, pamahaman pasal parubahan sistim pandidikan ngini dipangaruhi ulih banyaknya ulama Kalimantan Selatan nang balajar ka Timur Tangah hingga maulah punduk nang manarapkan sistim tingkatan.[7]

Manulis kitab[babak | babak asal-mulanya]

Inya banyak manulis wan manarjamahkan kitab wan risalah agama, baik nang bahasa Indunisia atawa Arab Malayu gasan kapantingan bahan palajaran di Punduk Darussalam Martapura atawa sagan bubuhan masyarakat[8]. Kitab-kitab nang ditulisnya antara lain:

  1. Risalah at Tauhid;
  2. Risalah al Fiqh;
  3. Risalah fi Sirah Sayyid al Mursalin;
  4. Tarqib al Ikhwan fi Tajwid al Qur’an;
  5. Kitab Durus alTasrif (3 jilid);
  6. Tabyin ar Rawiy bi Syarh al Arba’in an Nawawiy (tarjamahan);
  7. Ad Durr al Farid fi Syarh Jawharah at Tauhid;
  8. Risalat Hasbuna.
Kuburan Guru Kasyful Anwar

Kamatian[babak | babak asal-mulanya]

Tuan Guru Kasyful Anwar habis umur waktu baumur 55 tahun pada malam Sanayan, tanggal 18 Syawal 1359 Hijriah atawa tanggal 19 Nupimbir 1940. Inya dikuburkan di Kubah Kampung Malayu Martapura.

Jujuhutan[babak | babak asal-mulanya]

  1. ^ "Tuan Guru H. Kasyful Anwar: Ulama Kharismatik Tanah Banjar". iqra.id (dalam bahasa Indonesia). 2020-07-26. Diarsipkan dari versi asli tanggal 2020-12-28. Diakses tanggal 2022-05-28. 
  2. ^ a b "Syekh Kasyful Anwar, Ulama Besar dari Kalimantan Selatan". nu.or.id (dalam bahasa Indonesia). Diakses tanggal 2022-05-28. 
  3. ^ "Ulama Banjar (4): Biografi KH. Kasyful Anwar". Alif.ID (dalam bahasa Indonesia). 2020-10-21. Diakses tanggal 2022-05-28. 
  4. ^ Humaidy, Punduk Darussalam dalam Lintas Sejarah, Jurnal Kandil Edisi 1 tahun I, Mei 2003. H. 64
  5. ^ Humaidy, Punduk Darussalam dalam Lintas Sejarah, Jurnal Kandil Edisi 1 tahun I, Mei 2003. H. 65
  6. ^ Emroni, Potret Perkembangan Pendidikan Islam di Kalimantan Selatan, Jurnal Kandil Edisi 3 Tahun I, Desember 2003. H. 85
  7. ^ Emroni, Potret Perkembangan Pendidikan Islam di Kalimantan Selatan, Jurnal Kandil Edisi 3 Tahun I, Desember 2003. H. 85
  8. ^ Noor, Yusliani; Sayyidati, Rabini (2018-12-12). "Peranan Tuan Guru Haji Muhammad Kasyful Anwar dan Tuan Haji Setta dalam Mendirikan Pesantren Darussalam Martapura, Kabupaten Banjar, Kalimantan Selatan, 1924". JUSPI (Jurnal Sejarah Peradaban Islam). 2 (2): 74. doi:10.30829/j.v2i2.3037. ISSN 2580-8311.