Kartini

Tumatan Wikipidia basa Banjar, insiklupidia bibas
Loncat ke navigasi Loncat ke pencarian
R.A. Kartini
COLLECTIE TROPENMUSEUM Portret van Raden Ajeng Kartini TMnr 10018776.jpg
Repro negatif potret Raden Ajeng Kartini (gambar 1890-an)
Lahir 21 April 1879
Jepara, Hindia Walanda (wayah ngini Indunisia)
Maninggal 17 Siptimbir 1904 (umur 25)
Rembang, Hindia Walanda (wayah ngini Indunisia)
Ngaran Kiawan Raden Ayu Kartini
Dipinandui marga Imansipasi bibinian
Agama Islam
Kancaan K.R.M. Adipati Ario Singgih Djojoadhiningrat
Kanak Soesalit Djojoadhiningrat
Tanda tangan
Sign RA Kartini.png

Raden Adjeng Kartini (di ranakakan di Jepara, Hindia Walanda, 21 April 1879 – habis umur di Rembang, Hindia Walanda, 17 Siptimbir 1904 pas umur 25 tahun) atawa sabujurnya labih pas disambat Raden Ayu Kartini[lower-alpha 1] adalah saikung tukuh Jawa wan Pahlawan Nasiunal Indunisia. Kartini dikanal sawagai idabul kabangkitan bibinian Pribumi-Nusantara.

Riwayat hidup[babak | babak asal mulanya]

Abah Kartini, R.M.A.A. Sosroningrat.

Raden Adjeng Kartini baasal matan bubuhan priyayi atawa kalas bangsawan Jawa. Inya adalah anak bibinian matan Raden Mas Adipati Ario Sosroningrat, saikung patih nang diangkat jadi bupati Jepara sadin imbah Kartini ranak. Kartini adalah anak bibinian matan bini pamulaan, tagal lain bini tatambaian. Umanya bangaran M.A. Ngasirah, anak bibinian matan Nyai Haji Siti Aminah wan Kiai Haji Madirono, saikung guru agama di Telukawur, Jepara. Matan sisi abahnya, silsilah Kartini kawa dicari sampai Hamengkubuwana VI. Garis katurunan Bupati Sosroningrat wan jua kawa ditiringi pulang ka istana Karajaan Majapahit. Matan Pangeran Dangirin jadi bupati Surabaya wayah abat ka-18, padatuan Sosroningrat maisi banyak pusisi panting di Pangreh Praja.

Abah Kartini asal mulanya adalah saikung wedana di Mayong. Paraturan kulunial wayah ngitu mawajipakan saikung bupati babini saikung bangsawan. Marga M.A. Ngasirah lain bangsawan tinggi,[1] maka abahnya kawin pulang lawan Raden Adjeng Woerjan (Moerjam), katurunan langsung Raja Madura.[2] Imbah kawinan ngitu, abah Kartini diangkat jadi bupati di Jepara manggantiakan kadudukan abah ujut R.A. Woerjan, R.A.A. Tjitrowikromo.

Kartini adalah anak ka-5 matan 11 badangsanak ujut wan tiri. Matan sabarataan sapadangsanakan, Kartini adalah anak bibinian panuhanya. Kainya, Pangeran Ario Tjondronegoro IV, diangkat bupati wayah umur 25 tahun wan dikanal wayah patangahan abat ka-19 sawagai salah sabuting bupati panambaian nang mambari pandidikan Barat gasan kakanakannya.[2] Kaka Kartini, Sosrokartono, adalah sasaurang nang pintar dalam bidang basa. Sampai umur 12 tahun, Kartini dibariakan basakulah di Europeesche Lagere School (ELS). Di sini antara lain Kartini balajar basa Walanda. Tagal, imbah umur 12 tahun, inya musti bagana di rumah marga sudah kawa dipingit.

Surat Kartini - Rosa Abendanon (putikan)

Marga Kartini kawa babasa Walanda, di rumah inya mulai balajar saurang wan manulis surat gasan kawan-kawan kurispundinsi nang baasal matan Walanda. Salah sabutingnya adalah Rosa Abendanon nang banyak mandukungnya. Matan buku-buku, surat habar, wan majalah Irupa, Kartini tatarik ka kamajuan bapikir bibinian Irupa. Timbul kahandakannya gasan mamajuakan bibinian pribumi, marga inya malihat bahua bibinian pribumi baandak di satatus susial nang randah.

Kartini banyak mawaca surat kabar Semarang De Locomotief nang diasuh Pieter Brooshooft. Inya jua manarima leestrommel (pakit majalah nang diidarakan tuku buku gasan langganan). Di antaranya tadapat majalah kabudayaan wan ilmu pangatahuan nang liwar barat, ada jua majalah bibinian Walanda De Hollandsche Lelie. Kartini jua imbahnya babarapa kali mangirimakan tulisannya wan dimuat di De Hollandsche Lelie. Matan surat-suratnya nampak Kartini mawaca apa haja lawan liwar pahatian sambil maulah catatan-catatan. Bahanu Kartini manyambat sabuting karangan atawa mangutip babarapa kalimat. Pahatiannya kada wastu samata-mata sual imansipasi bibinian, tagal jua masalah susial awam. Kartini malihat pajuangan bibinian supaya dapat kabibasan, utunumi wan pasamaan hukum sawagai palihan matan garakan nang taligar. Di antara buku nang diwaca Kartini sabalum baumur 20, tadapat judul Max Havelaar wan Surat-Surat Cinta karia Multatuli, nang wayah Nupimbir 1901 sudah diwacanya dua kali. Suwalih ngitu, Kartini jua mawaca De Stille Kraacht (Kakuatan Gaib) karia Louis Coperus wan karia Van Eeden nang bamutu tinggi, karia Augusta de Witt nang sadang-sadang haja, roman-feminis karia Nyonya Goekoop de-Jong Van Beek wan sabuting roman anti-parang ulahan Berta Von Suttner, Die Waffen Nieder (Andak Sanjata). Sabarataannya babasa Walanda.

Ulih kuitannya, Kartini dikawinakan lawan bupati Rembang, K.R.M. Adipati Ario Singgih Djojo Adhiningrat, nang sudah suah baisi talung bini. Kartini kawin wayah tanggal 12 Nupimbir 1903. Lakinya paham kahandakan Kartini wan Kartini dibari kabibasan wan didukung mandiriakan sakulah bibinian di subalah timur lawang garbang kumpliks kantur kabupatin Rembang, atawa di sabuah bangunan nang wayah ngini dipakai jadi Gadung Pramuka.

Sakulah Kartini (Kartinischool), 1918.

Anak pamulaan wan sakaligus pauncitannya, Soesalit Djojoadhiningrat, ranak wayah tanggal 13 Siptimbir 1904. Babarapa hari imbahnya, 17 Siptimbir 1904, Kartini habis umur wayah umur 25 tahun. Kartini dikuburakan di Disa Bulu, Kacamatan Bulu, Rembang.

Barakat kacangakalan Kartini, balakangan didiriakan Sakulah Bibinian ulih Yayasan Kartini di Semarang wayah 1912, wan imbahnya di Surabaya, Yogyakarta, Malang, Madiun, Cirebon, wan dairah lainnya. Ngaran sakulah ngitu adalah "Sakulah Kartini". Yayasan Kartini ngini didiriakan ulih kulawarga Van Deventer, saikung tukuh Pulitik Itis.

Saupama kada sawat baulah banyak gasan kamajuan bangsa, Kartini manampaiakan ide-ide pahanyaran masarakat nang malingkawi jamannya malalui surat-suratnya nang basajarah.

Cita-citanya nang tinggi dituangakan dalam surat-suratnya gasan patuhan wan sahabatnya urang Walanda di luar nagari, kaya Tuan EC Abendanon, Ny MCE Ovink-Soer, Zeehandelaar, Prof Dr GK Anton wan Ny Tuan HH von Kol, dan Ny HG de Booij-Boissevain. Surat-surat Kartini dicungulakan di nagari Walanda wayah 1911 ulih Mr JH Abendanon lawan judul Door Duisternis tot Licht. Dialihbasaakan ka basa Indunisia ulih sastrawan pujangga hanyar Armjn Pane pada 1922 lawan judul Habis Gelap Terbitlah Terang.[3]

Surat-surat[babak | babak asal mulanya]

Imbah Kartini habis umur, Jacques Abendanon mangumpulakan wan mambukuakan surat-surat nang suah dikirimakan R.A Kartini gasan kakawanannya di Irupa. Abendanon wayah ngitu manjabat jadi Mantri Kabudayaan, Agama, wan Karajinan Hindia Walanda. Buku ngitu dibari judul Door Duisternis tot Licht nang arti harpiahnya "Dari Kegelapan Menuju Cahaya". Buku kumpulan surat Kartini ngini dicungulakan wayah 1911. Buku ngini dicitak sabanyak lima kali, wan di citakan pauncitan tadapat tambahan surat Kartini.

Wayah tahun 1922, Balai Pustaka mancungulakannya dalam basa Melayu lawan judul nang dialihbasakan jadi Habis Gelap Terbitlah Terang: Boeah Pikiran, nang adalah paalihbasaan ulih Empat Saudara. Imbah ngitu, wayah tahun 1938, kaluarlah Habis Gelap Terbitlah Terang pirsi Armijn Pane saikung sastrawan Pujangga Hanyar. Armijn mambagi buku jadi lima bab pambahasan gasan manunjukakan parubahan cara bapikir Kartini sapanjang waktu kurispundinsinya. Pirsi nhini sawat dicitak sabanyak sawalas kali. Surat-surat Kartini dalam basa Inggris suah jua dialihbasakan ulih Agnes L. Symmers. Suwalih ngitu, surat-surat Kartini suah jua dialihbasakan ka dalam basa-basa Jawa wan Sunda.

Cungulnya surat-surat Kartini, saikung bibinian paribumi, liwar manarik pahatian masarakat Walanda, wan pamikiran-pamikiran Kartini mulai maubah janakan masarakat Walanda tahadap bibinian paribumi di Jawa. Pamikiran-pamikiran Kartini nang tatuang dalam surat-suratnya jua jadi inspirasi gasan tukuh-tukuh kabangkitan nasiunal Indunisia, antara lain W.R. Soepratman nang manciptaakan lagu bajudul "Ibu Kita Kartini". Lagu ngitu manggambarakan inti pajuangan bibinian gasan mardika.

Pamikiran[babak | babak asal mulanya]

Duit kartas pacahan IDR 5 citakan tahun 1952 lawan gambar Kartini.

Di surat-surat Kartini tatulis pamikiran-pamikirannya tantang kaadaan susial wayah ngitu, tautama tantang kaadaan bibinian paribumi. Sapalih ganal surat-suratnya baisi kaluhan wan gugatan hususnya manyangkut budaya di Jawa nang dijanak sawagai pahawar kamajuan bibinian. Inya handak bibinian baisi kabibasan manuntut ilmu wan balajar. Kartini manulis ide wan cita-citanya, kaya tatulis: Zelf-ontwikkeling wan Zelf-onderricht, Zelf- vertrouwen wan Zelf-werkzaamheid wan jua Solidariteit. Sabaratan ngitu atas dasar Religieusiteit, Wijsheid en Schoonheid (yaitu Katuhanan, Kabijaksanaan, wan Kaindahan), ditambah lawan Humanitarianisme (parikamanusiaan) wan Nasiunalisma (cinta tanah air).

Riparinsi[babak | babak asal mulanya]


Kasalahan pangutipan: Ditemukan tag <ref> untuk kelompok bernama "lower-alpha", tapi tidak ditemukan tag <references group="lower-alpha"/> yang berkaitan

  1. ^ Interview with Kathryn Robinson: Secularization of Family Law in Indonesia, Harvard Asia Quarterly, diakses 21 April 2010
  2. ^ a b Kasalahan pangutipan: Tag <ref> tidak sah; tidak ditemukan teks untuk ref bernama jote p2
  3. ^ Nasar, Fuad (2015-04-21). "Arti Kartini di Masa Kini". Medcom.id. Diakses tanggal 2020-05-10.