Capil ka isi

Kacang landir

Tumatan Wikipidia Banjar, kindai pangatahuan
Okra Liberia

Kacang landir (Abelmoschus esculentus Moench, basa Inggris: lady's fingers, okra, atawa gumbo) adalah parian tumbuhan bakambang dalam suku Malvaceae nang tiba matan dairah di parak Ethiopia wayahini. Dukanu, tumbuhan ngini masuk dalam genus Hibiscus, tagal wayahini diubah jadi masuk genus Abelmoschus. Inya banyak dihaga di dairah trupis.

Ukuran buahnya sama ganal lawan lombok hijau, sakulilingannya baluk, babulu halus wan bakalir hijau. Lamun ditatak pacangan tatiring bigi-bigi kicul di sakulilingannya. Lamun dimasak, pacangan kaluar lendir matan dalamnya. Rasanya ranyah lawan tektur mahirip tarung. Lalap ngini kawa diulah jadi kari, balado, campuran salad atawa masakan tumis.

Ngaran ilmiah gasan Kacang landir adalah Abelmoschus Esculentus Moench. Dalam taksonomi, Kacang landir masuk suku kapas-kapasan.[1] Ngaran lainnya adalah okra. Partumbuhan Kacang landir maumpati garumbung tanaman sabat.[2]

Tagas akar di Kacang landir yaitu akar tunggang lawan akar mahiga. Akar tunggangnya tumbuh ka dalam, amun akar nang dihiga tumbuh dangkal.[2]

Kacang landir kawa tumbuh sampai satu m. Bagian batangnya linyak lawan sadikit baisi cikang nang babulu-bulu halus wan kasar.[2]

Kambang Kacang landir dibedakan menjadi dua warna, yaitu kuning wan ungu. Tagasnya nangkaya kambang di rapun kapas, tagal tapanjang lagi.[2]

Tagas buah Kacang landir mahirip lawan karawila nang baukuran halus. Panjang Kacang landir wastu satu jangkal lawan bagian hujung nang balancip.[3]

Kacang landir baisi banyak huaran. Tagal, pariannya rajin nitu kawa dilainakan maniring ka balangnya nang jadi Kacang landir hijau wan Kacang landir habang.[4]

Kacang landir hijau

[babak | babak asal-mulanya]

Kacang landir hijau baisi buah nang rahatan dipanen, lakas karas wan basarabut. Kundisi nitu tajadi wastu 7 hari imbah tajadinya antesis. Marga kundisi ngini, masa panen Kacang landir hijau wastu salawas 7 hari imbah antesis.[5] Warna hijau di Kacang landir diulahakan lawan pigmen klorofil.[6]

Kandungan giji

[babak | babak asal-mulanya]

Di dalam Kacang landir baisian sarabut pangan nang tinggi.[7] Kacang landir baisi banyak giji nang diparluakan gasan diet, yaitu pitamin, kalsium, kalium wan mineral.[8] Pitamin nang malimpuar di dalam Kacang landir adalah pitamin B. parian pitamin B nang malimpuar di dalam Kacang landir adalah pitamin B3 wan pitamin B9.[9] Buah Kacang landir nang masih anum baisi banyak pitamin C.[10] Sualih nitu, Kacang landir juwa baisi pitamin K.[11]

Partumbuhan

[babak | babak asal-mulanya]

Kacang landir kawa tumbuh di macam-macam tanah lawan nang sistim mangaringi nang bagus. Kacambah kada pacangan tumbuh matan bigi Kacang landir lamun suhunya kurang pada 17 °C. Paung nang pacangan ditanam musti dirandam saharianan badahulu.[12] Kambang Kacang landir pacangan mulai cungul imbah 50 hari imbah batanam.[13]

Wadah batanam

[babak | babak asal-mulanya]

Kacang landir marupakan tanaman budidaya di dairah tropis wan sub tropis. Budidayanya hudah talah digawi di daratan Aprika, Amirika, Eropa wan Asia.[4] Batanam Kacang landir hudah digawi juwa di nagara Filipina, Malaysia, Thailand wan Vietnam.[5] Pahadangan nitu di Indunisia, parian Kacang landir nang banyak ditanam adalah Kacang landir hijau.[5]

Batanam Kacang landir digawi lawan mananam biginya nang tuha. Luang gasan bigi dalamnya 20–30 cm. Marga kulit bigi nang karas, partumbuhan tunas hanyar cungul imbah 7-12 hari wayah pananaman.[2] Wadah partumbuhan gasan Kacang landir wastu tanah. Suhu lingkungan gasan partumbuhannya antara 25-30 °C. Partumbuhan Kacang landir kawa didukung lawan pamupukan nang rajin. Masa panen wayah pananaman dimulai rahatan bulan katalu. Tanaman Kacang landir kawa baumur sampai 1 tahun.[14]

Batanaman Kacang landir musti digawi di padang nang humap. Marga hayumu di Kacang landir pacangan cungul rahatan batanam di padang nang karing. Parian musuh utamanya iya kupu-kupu. Daun Kacang landir itupang nang jadi wadah kakatujuan kupu-kupu maandak intalunya. Kapumpung kupu-kupu juwa manggulung daun Kacang landir. Kundisi nang kaya ini pang nang maulah panyakit bagi partumbuhan Kacang landir.[14]

Bahan masakan

[babak | babak asal-mulanya]

Kacang landir baisi banyak manpaatnya, Marga bagian daun, batang, buah wan bigi kawa dimanpaatkan. Buah Kacang landir kawa dijadiakan sayur.[5] Kacang landir bagus diulah jadi masakan rahatan masih anum. Lamun sudah tuha, hasil masakan Kacang landir pacangan karas.[7] Maulah Kacang landir gasan sayuran lawan cara ditumis,[15]  kawa juwa dijarang atawa disanga. Lawan juwa ada haja nang makan basambal.[16]

Kacang landir juwa baisi banyak manpaat gasan kasihatan manusia marga baisi protein, pitamin, kalsium, antioksidan wan mineral.[5] Kacang landir juwa baisi kandungan sarabut nang tinggi nang bamanpaat gasan mencegah tarjadinya ngalih bahira, awak lamak, kolesterol tinggi wan panyakit gula.[7] Kacang landir hijau baisi klorofil nang bamanpaat gasan antioksidan, antiradang, antikanker, wan antimutagenik.[6]

Catatan kaki

[babak | babak asal-mulanya]
  1. ↑ Latif, Ishan (2022). Tim Elementa, ed. Budidaya Okra: Sayuran Kaya Manfaat yang Mulai Digandrungi. Elementa Agro Lestari. hlm. 3. ISBN 978-623-5386-79-9.
  2. 1 2 3 4 5 Sunarjono, Hendro (2013). Bertanam 36 Jenis Sayur. Jakarta: Penebar Swadaya. hlm. 186. ISBN 978-979-002-579-0.
  3. ↑ Tim Dapur Demedia (2010). Hidangan Favorit Serba Sayur untuk Sehari-hari. Jakarta Selatan: Demedia Pustaka. hlm. 4. ISBN 979-082-023-2.
  4. 1 2 Ikrarwati dan Rokhmah, N. A. (2018). Sastro, Yudi, ed. Budidaya Okra dan Kelor dalam Pot (PDF). Jakarta Selatan: Balai Pengkajian Teknologi Pertanian (BPTP) Jakarta. hlm. 2. ISBN 978-979-3628-38-7.
  5. 1 2 3 4 5 Hayati, D., Sutoyo, dan Fadli, M. (ed.). "Evaluasi F1 Hasil Persilangan Kultivar Okra (Abelmoschus esculentus (L.) Moench) Hijau dengan Beberapa Varietas Okra Introduksi" (PDF). Prosiding Seminar Nasional Perhimpunan Ilmu Pemuliaan Tanaman (PERIPI) 2018 “Kedaulatan Benih Menuju Lumbung Pangan Dunia 2045”. LPTIK Universitas Andalas: 226. ISBN 978-602-5539-35-0.
  6. 1 2 Hiola, Siti Khadijah Yahya (2018). Teknologi Pengolahan Sayuran. Makassar: Inti Mediatama. hlm. 49. ISBN 978-602-52225-8-0.
  7. 1 2 3 Buleng, Apri (2020). Sajian Sayur ala Rumahan. Jakarta: Demedia Pustaka. hlm. 4. ISBN 978-979-082-325-9.
  8. ↑ Irene, dkk. (Desember 2021). Diet Sehat dengan Makanan Tinggi Serat. Guepedia. hlm. 65. ISBN 978-623-5508-47-4.
  9. ↑ Lingga 2010, hlm. 264.
  10. ↑ Lingga 2010, hlm. 265.
  11. ↑ Lingga 2010, hlm. 266.
  12. ↑ Sukprakarn, S., dkk. (2012). Panen dan Menyimpan Benih Sayur-sayuran: Buku Panduan untuk Petani [Saving Your Own Vegetable Seeds: A Guide for Farmers]. Shanhua: AVRDC - The World Vegetable Center. hlm. 19. ISBN 92-9058-191-3.
  13. ↑ Sunarjono, H., dan Nurrohmah, F. A. (2018). Bertanam Sayuran Buah. Jakarta Timur: Penebar Swadaya. hlm. 99. ISBN 978-979-002-848-7.
  14. 1 2 Iritani, Galuh. Vegetable Gardening: Panduan Praktis Menanam Sayur di Rumah. IndonesiaTera. hlm. 74.
  15. ↑ Ma, Linna (2019). Cooking at Home. Jakarta: Visimedia. hlm. 82. ISBN 978-979-065-311-5.
  16. ↑ Nihayati, Laily (2010). 10 Juta Rupiah Keliling Qatar dan Umrah. Jakarta: Penerbit PT Gramedia Pustaka Utama. hlm. 125. ISBN 978-979-22-7180-5.

Daftar pustaka

[babak | babak asal-mulanya]
Dijumput matan "https://bjn.wikipedia.org/w/index.php?title=Kacang_landir&oldid=107141"