Capil ka isi

Itikap

Tambah interwiki
Tumatan Wikipidia Banjar, kindai pangatahuan
Itikap di Masigit salajur diisi lawan mambaca Al-Qur'an

Itikap, nang diranakakan matan basa Arab ('akafa) baarti batinggal sasuatu nang baik atawa buruk biar kada di dalam masigit haja.[1] Ujar istilahnya ialah badiam saurang, kawa sacara nyata atawa hukum di dalam masigit ngitu lawan sifat tartantu, lawan tujuannya gasan mamaraki saurang lawan Allah swt. malalui amalan-amalan nang rancak digawi di situ.[2] Urang nang baitikap ngini disambat jua mu'takip. Rukun itikap ada ampat, yaitu niat, badiam, di dalam masigit, wan mu'takip. Syarat mu'takip nang harus dipanuhi ada tiga: Islam, baakal, wan suci matan haid, nifas, wan junub. Jadi, baitikap ngini sawagai suatu kagiatan nang umum digawi ulih umat Islam pas bulan Ramadan.[3]

Macam-Macam Itikap

[babak | babak asal-mulanya]

Ada ampat macam itikap nang dikanal: itikap sunah, wajib, makruh, wan haram.[4]

  1. Itikap sunnah ialah iktikap nang digawi samata-mata gasan mamaraki saurang wan maharapakan rida Allah swt. sacara sukarila, kaya itikap 10 ari akhir pas Ramadan.
  2. Itikap wajib ialah itikap karana banazar ulih sasuatu, kaya baujar, "Jaka Allah swt. manyambuhakan panyakit ulun ngini, kena ulun akan baiktikap."
  3. Itikap makruh ialah jaka digawi ulih bibinian nang bakalakuan jua maundang pitnah biar hudah lawan ijin urang tuha atawa laki inya.
  4. Itikap haram ialah jaka digawi saurang bini kada baijin lawan laki inya, atawa budak kada baijin lawan nang baisi inya.

Waktu Itikap

[babak | babak asal-mulanya]

Itikap nang wajib tagantung pas barapa lawas waktu nang dinazarakan. Jaka iktikap sunnah, kadada batasan waktu tartantu, wayah kawa, pas malam atawa siang ari kawa haja, waktunya jua bulih lawas atawa satumat. Ya'la bin Umayyah suah baucap, "Sabujurnya ulun badian satu jam di masigit gasan baitikap haja, kadada nang lain."[5][6]

Waktu itikap ngini rancaknya digawi pas 10 malam tarakhir bulan Ramadan di masigit, yaitu dimula'i imbah tabanamnya matahari pas malam ka-21, wan barakhir pas tabanam matahari di malam tarakhir Ramadan.[7] Tujuan utama nang ngini ialah mandapatakan Lailatul Qadar wan maminta ampunan ulih Allah swt.[8]

Tampat Itikap

[babak | babak asal-mulanya]

Umumnya, tampat itikap batampat di masigit, tapi ada sadikit bida matan sapalih ulama. Imam Hanafi bapandapat, masigit nang dipakai gasan itikap ialah masigit nang baisi imam wan muadzin husus, biar masigit nang dipakai gasan sambahyang nang wajib atawa kada. Imam Hanbali bapandapat, itikap kawa digawi di masigit nang rancak dipakai gasan manggawi sambahyang bajamaah haja. Babida lawan pandapat Majilis Tarjih ialah nang dipakai gasan sambahyang Jumahat marupakan tampat nang paling utama gasan baitikap, tagal itikap di masigit nang rancak jua kada mambatalakan itikap ngitu saurang, nang baarti tatap dianggap sah haja.[9]

Niat Itikap

[babak | babak asal-mulanya]

Lafaz niat itikap nang kawa dibaca gasan mayakinakan hati saurang, yaitu: Nawaitu an 'atakifa fii haadzaal masjidi maa dumtu fiihi lillahi ta'ala. Nang baarti, "Sanghaja ulun baniat gasan baitikap di dalam masigit ngini salawas ulun ada di dalamnya karana Allah ta'ala."[2]

Syarat-Syarat Itikap

[babak | babak asal-mulanya]

Urang nang baitikap harus mamanuhi syarat-syarat inya, yaitu:[1]

  1. Niat;
  2. Manatap di masigit;
  3. Digawi di dalam masigit;
  4. Jadi saurang mu'takip.

Ulih karananya, itikap kada sah gasan urang nang kada Muslim, kakanakan nang balum baligh, urang nang kada waras akalnya (gila), urang nang masih kaadaan junub, wan bibinian masih dalam wayah haid wan nifas.[10]

Rukun Itikap

[babak | babak asal-mulanya]

Rukun itikap ngini ada dua: Baniat, wan badiam di masigit, maambil matan QS. Al-Baqarah ayat 187.[10]

Nang ngini ada dua pandapat ulama tarait masigit sawagai tampat baitikap. Sapalih ulama mambulihakan itikap di saban masigit nang dipakai gasan sambahyang bajamaah lima waktu atawa nang wajib. Hal ngitu dalam rangka baugah matan rancaknya kaluar masigit wan gasan manjaga palaksanaan sambahyang bajamaah saban waktu ngitu. Ulama lain mansyaratakan supaya itikap ngitu digawi di masigit nang dipakai gasan maulah sambahyang Jumahat bajamaah, sampai-sampai urang nang baitikap kada lagi maninggalakan tampat itikapnya manuju masigit lain gasan sambahyang Jumahat. Pandapat ngini dikuatakan ulih bubuhan ulama Syafi'iyah, nang utama ialah itikap di masigit jami, karana Rasulullah saw. baitikap di masigit jami. Labih utama lagi di tiga masigit, yaitu Masigit Al-Haram (Makkah), Masigit Nabawi (Madinah), wan Masigit Al-Aqsa (Palistina).[11]

Cara-Cara Baitikap

[babak | babak asal-mulanya]

Ada nang harus disiapakan saurang dahulu, gasan fisik wan mintal sabalum manggawi itikap, di antaranya:[12]

  • Gasan manggawi itikap, harus manganali waktu wan tampat, karancakannya waktu gasan manggawi itikap pas 10 ari tarakhir di bulan Ramadan, wan tampat itikapnya digawi di masigit.
  • Sabalum mamula'i itikap, dianjurakan gasan tatap manggawi ibadah tamasuk sambahyang, bazikir, wan mambanyaki baca Al-Qur'an, jua manghayati makna agama di dalam kahidupan saurang.
  • Salawas manggawi itikap, sabaiknya baugah matan hal-hal nang basifat gangguan matan dunia luar, tamasuk papadahan atawa bapandiran nang kadada baguna, mamakai handphone di luar kabutuhan nang panting.
  • Maumpati cuntuh nang hudah diajari ulih Rasulullah, matan baamalan, atawa jua itika dalam baitikap. Hal ngitu marupakan cara-cara nang dianjurakan banar.

Hukum Itikap

[babak | babak asal-mulanya]

Hukum panambaian matan itikap ialah sunnah, tapi hal ngitu kawa baubah jadi wajib jaka ada hal nang mawajibakan, kaya halnya baisi nazar lawan sasuatu. Salain ngitu, hukum ngini kawa jadi haram jaka digawi ulih bini kada baijin laki, wan kawa jadi makruh jaka digawi ulih bibinian nang kawa maundang pitnah.[13]

Pambagian Itikap

[babak | babak asal-mulanya]

Pambagian itikap ada tiga macam, yaitu:[14]

  1. Itikap mutlak, marupakan itikap nang digawi kadada ikatan waktu, gasan batasan minimal baitikap adalah salawas tuma'ninah dalam sambahyang, wan panjang durasinya kada ditantuakan. Lafaz matan niat itikap mutlak ialah "nawaitu an 'atakifa fii haadzaal masjidi lillahi ta'ala", baarti: Sanghaja ulun baitikap di masigit ngini karana Allah ta'ala.[15]
  2. Itikap kadada tarikat waktu, marupakan itikap nang kada ditantuakan ulih waktu manggawinya, kawa digawi samalaman imbah kawa satu bulan jua. Niatnya ngini ialah "nawaitu an 'atakifa fii haadzaal masjidi yauman (atawa) lailan (atawa) kaamilan (atawa) sayhran lillahi ta'ala", baarti: Sanghaja ulun baitikap di masigit ngini salawas satu ari/samalaman/samalaman wan saharian/satu bulan karana Allah ta'ala.[15]
  3. Itikap nang dinazarakan, marupakan itikap nang hudah dijanjiakan ulih sasaurang lawan diri saurang wayah mandapatakan sasuatu nang dikahandak. Lafaz niatnya ialah "nawaitu an 'atakifa fii haadzaal masjidi syahran mutataabi'an fardan lillahi ta'ala", baarti: Sanghaja ulun baitikap di masigit ngini salawas satu bulan baturut-turut karana Allah ta'ala.[13]

Kagunaan Itikap

[babak | babak asal-mulanya]

Kagunaan itikap ngini banyak banar, di antaranya:[3]

  • Maningkatakan kaimanan wan katakwaan lawan Allah swt;
  • Mambaiki kualitas saurang wan maningkatakan kasadaran spiritual;
  • Maugah matan hal-hal nang kawa mangganggu kunsintrasi dalam baibadah;
  • Maningkatakan kaitan lawan sasama Muslim nang manggawi itikap di tampat nang sama.

Hal-Hal nang Dibulihakan gasan Mu'takip

[babak | babak asal-mulanya]

Ada 5 hal nang dibulihakan gasan mu'takip, yaitu:[6][16]

  1. Kaluar matan tampat itikap gasan maantar bini, sawagaimana nang digawi ulih Rasulullah saw. lawan bininya, Shafiyah bin Huyay ra. (matan HR. Bukhari wan Muslim);
  2. Manyurui atawa mancukur rambut, mamutung kuku, mambarasihi badan matan kuturan wan bau badan;
  3. Kaluar gasan kaparluan nang harus dipanuhi wayahini, kaya bahira wan bakamih, makan, minum (jaka kadada nang maantarakannya), wan sagala sasuatu nang kada mungkin digawi di dalam masigit, tapi inya harus lakas babulik imbah manuntungakan kaparluannya[17];
  4. Makan, minum, wan guring di masigit lawan sanantiasa manjaga kasucian wan kabarasihan masigit;
  5. Manamui tamu di masigit gasan hal-hal nang dibulihakan dalam agama.

Hal-Hal nang Mambatalakan gasan Mu'takip

[babak | babak asal-mulanya]

Salain ngitu, hal-hal nang mambatalakan gasan mu'takip, yaitu:[2][11]

  1. Maninggalakan masigit lawan sanghaja kadada bakaparluan nang dikacualikan biar satumat haja[18];
  2. Murtad, atawa kaluar matan agama Islam;
  3. Kada baakal lagi, karana gila atawa mabuk;
  4. Haid atawa nifas;
  5. Bajamak lawan bini, tapi mangutii kada basyahwat, kadapapa sawagaimana nang digawi Nabi saw. lawan bini-bini inya;
  6. Tulak gasan sambahyang Jumahat (gasan bubuhan nang mambulihakan itikap di langgar nang kada dipakai gasan sambahyang Jumahat);
  7. Kaluar gasan mamanuhi kawajiban nang kawa ditunda;
  8. Kaluar disartai alasan sampai babarapa kali wan digawi karana kahandak saurang.

Jujuhutan

[babak | babak asal-mulanya]
  1. 1 2 Al-Kubaisi, Ahmad Abdurrazaq (1994). Itikaf Penting Dan Perlu (dalam bahasa Indonesia). Gema Insani. ISBN 978-979-561-254-4.
  2. 1 2 3 "I'tikaf di Dalam dan di Luar Ramadan | Dr. H. Chazim Maksalina, M.H." www.pta-gorontalo.go.id. Diakses tanggal 2026-02-22.
  3. 1 2 "Pengertian Iktikaf: Arti, Tujuan, Syarat, dan Manfaat". SINDOnews Internasional (dalam bahasa Indonesia). Diakses tanggal 2026-02-22.
  4. ↑ "Cara Iktikaf di Masjid dan Rumah, Lengkap Bacaan Niat dan Keutamaannya". liputan6.com (dalam bahasa Indonesia). 2021-04-29. Diakses tanggal 2026-02-22.
  5. ↑ Widodo, Urip (2021-05-09). "I'tikaf dan Lailatul Qadr itu Hal yang Berbeda". Inspirasi Muslimah (dalam bahasa Indonesia). Diakses tanggal 2026-02-22.
  6. 1 2 "Hendak I'tikaf di Bulan Ramadan, Begini Tata Caranya". Tempo (dalam bahasa Indonesia). 23 Juni 2015 | 12.47 WIB. Diakses tanggal 2026-02-22.
  7. ↑ "I'tikaf: Niat, Tata Cara, dan Hukumnya". Telkomsel (dalam bahasa Indonesia). Diakses tanggal 2026-02-22.
  8. ↑ "Media Center". 2014-11-01. Diakses tanggal 2026-02-22.
  9. ↑ Ilham (2023-04-09). "I'tikaf: Pengertian, Waktu, Durasi, dan Tempat Pelaksanaannya". Muhammadiyah (dalam bahasa Indonesia). Diakses tanggal 2026-02-22.
  10. 1 2 "Fiqih I'tikaf Lengkap". www.rumahfiqih.com. Diakses tanggal 2026-02-22.
  11. 1 2 "Iktikaf". Tribunnewswiki.com (dalam bahasa Indonesia). Diakses tanggal 2026-02-22.
  12. ↑ "I'tikaf: Pengertian, Niat, Syarat, dan Tata Caranya". Tempo (dalam bahasa Indonesia). 2024-04-01. Diakses tanggal 2026-02-22.
  13. 1 2 "Panduan Pelaksanaan I'tikaf: Lengkap dengan Dalil, Rukun, dan Lafal Niatnya". NU Online (dalam bahasa Indonesia). Diakses tanggal 2026-02-22.
  14. ↑ "Tata Cara I'tikaf dan Keutamaannya di 10 Hari Terakhir Bulan Ramadhan". NU Online (dalam bahasa Indonesia). Diakses tanggal 2026-02-22.
  15. 1 2 Qosim, Ahmad Fauzi (2022-04-27). "Tata Cara Itikaf dan Bacaan Lengkap Agar Tidak Batal" (dalam bahasa Inggris). Diakses tanggal 2026-02-22.
  16. ↑ Masyithoh, Nur Isnaini (2025-03-22). "Hikmah dan Tata Cara I'tikaf di Bulan Ramadhan". BAZNAS Indonesia (dalam bahasa Indonesia). Diakses tanggal 2026-02-22.
  17. ↑ "Keutamaan I'tikaf, Niat, dan Tata Caranya - Bank Mega Syariah". www.megasyariah.co.id (dalam bahasa Inggris). Diakses tanggal 2026-02-22.
  18. ↑ "Itikaf: Arti, Hukum, Rukun, Syarat & Hal yang Membatalkan". Yatim Mandiri (dalam bahasa Indonesia). 2024-03-15. Diakses tanggal 2026-02-22.
Dijumput matan "https://bjn.wikipedia.org/w/index.php?title=Itikap&oldid=110050"