Ratu

Ratu adalah ngaran gelar gasan anggota kerajaan.

Asal Kata

"Ratu" dalam Bahasa Jawa Kuno tu masih ada hubungannya lawan istilah Datu lawan Latu. Ratu artinya orang nang berkuasa atawa pimpinan dari suatu kelompok. Istilah ratu asli Bahasa Austronésia ini kada gasan jenis kelamin tertentu aja. Lakian atawa binian kawa memakai gelar ini. Misalnya raja Kerajaan Mataram Hindu ngarannya Raké Mataram Sang Ratu Sanjaya. Di Kerajaan Singhasari ada Ratu Angabhaya. Sidin bedua ni lakian, tapi memakai gelar ratu. Kata "Kraton" asalnya dari ratu jua, yaitu "ke-ratu-an" nang artinya istana wadah ratu tinggal. Sampay wahini di Jawa kata "Kraton" tetap dipakay gasan menyambat istana wadah raja tinggal.

Lawas-kelawasan, kebudayaan Hindu bemagin berkembang di Nusantara. Istilah raja nang asalnya dari Bahasa Sanskerta mulay menggantiakan istilah ratu. Imbah itu, istilah ratu mulay dipakay gasan anggota kerajaan binian.

Ratu Banjar

Anggota kerajaan Banjar nang suwah memakay gelar ratu antara lain Ratu Agung/Ratu Tuha (Artinya: raja agung/raja tuha. Gelar nang dipakay di masigit: Sultan Inayatullah/Sultan Indallah), Ratu Anom/Ratu Anum (Artinya raja anum. Gelar nang dipakay di dalam masigit: Sultan Sa'idullah/Sultan Sa'idillah), Ratu Bagawan (Raja Kotawaringin I), dan lain-lain. Ini waktu gelar ratu masih lazim dipakay oleh lakian.

Gelar resmi gasan putra mahkota Kesultanan Banjar adalah Pangeran Ratu.

Lawas-kelawasan, gelar ratu jarang dipakay lakian lagi. Gelar ratu imbah itu dipakay gasan gelar paling tinggi anggota kerajaan binian di Kesultanan Banjar, selével lawan gelar "Pangéran" gasan anggota kerajaan nang lakian. Nang memakay gelar ratu antara lain anak binian raja, permaisuri, ading binian raja, dan lain-lain. Contohnya Ratu Intan lawan Ratu Zaléha.

Ratu dalam Bahasa Indonesia

Dalam Bahasa Indonesia, istilah ratu dipakay gasan menyambat raja bini-bini, yaitu binian nang memerintah atawa berkuasa di suatu negara. Contohnya Ratu Elizabeth II, laki sidin lain raja, sidin nang berkuasa. Selain itu, ratu gén dipakay gasan menyambat permaisuri. Contohnya Ratu Rania, permaisuri Abdullah II, laki sidin nang raja, sidin permaisurinya aja.