Capil ka isi

Imsak

Tumatan Wikipidia Banjar, kindai pangatahuan
Tradisi Bagarakan Sahur (budaya Banjar) nang digawi sampai wayahnya Imsak

Imsak asalnya tumatan bahasa Arab "amsaka-yumsiku-imsakan" nang baarti manahani atawa manyangkal. Imsak adalah wayah tartantu nang jadi paringatan gasan maampihi atawa manggawi ihwal nang kawa mambatalakan puasa. Wayah imsak jua disambat sabagai wayah gasan bahati-hati ulih urang Islam nang handak puasa.[1]

Wayah imsak nang rancak dipakai adalah wayah nang diulah ulih ulama gasan kahati-hatian (ihtiyath). Pamakaian ihtiyath di Indonesia sudah akur ulih ulama, yaitu 10 manit sabalum urang bang (adzan) subuh.[1]

Al-Qur'an wan Hadis Parihal Imsak

[babak | babak asal-mulanya]

Al-Baqarah ayat 187

[babak | babak asal-mulanya]

"Wan makan minumlah ikam sabarataan sampai tarang gasan ikam banang putih tumatan banang hirang, yaitu fajar." (Al Baqarah: 187)

Wahbah Az Zuhaili dalam tulisannya, Tafsir Munir, manjalasakan bahuwa banang putih wan banang hirang adalah umpama haja. Nang dimaksud banang putih yaitu wayah subuh, wayah mulai tarang ari, sadangkan nang dimaksud banang hirang adalah wayah malam ari.[2]

Hadis Aisyah dalam Shohih Bukhari

[babak | babak asal-mulanya]

“Kadanya bang (adzan) Bilal gasan mahalangi (sakira ampih) sahur-sahur buhan pian barataan. Sabujurnya bang-nya Bilal nitu partanda wayah malam ari (gasan mambangunakan urang), maka makan wan minumlah buhan pian barataan sampai buhan pian mandangar bang (adzan) Ibnu Ummu Maktum. Sabujurnya inya kada bang sampai wayah fajar datang."

Hadis nitu manjalasakan bahuwa wayah dimulainya puasa adalah pas bang subuh bakumandang. Wayah imsak jadi bantuk kahati-hatian sakira wayah kita sahur kada masuk dalam wayah nang sudah kada bulih makan wan minum.[2]

Hadis Zaid bin Tsabit dalam Shohih Bukhari

[babak | babak asal-mulanya]

"Sudah bakisah awan kami Muslim bin Ibrahim, sudah bakisah awan kami Hisyam, sudah bakisah awan kami Qatadah, tumatan Anas, tumatan Zaid bin Tsabit R.A., inya baujar: Kami sahur awan Nabi SAW, balalu Nabi badiri manggawi sambahyang. Aku batakun: Barapa wayah antara bang (adzan) wan sahur (wayah nitu)? Sidin manjawap: kira-kira nangkaya mambaca 50 ayat (Al-Qur'an)."

Al Muhallab baujar dalam hadis ngini ada katarangan gasan maukur wayah pakai standar kalakuan. Bangsa Arab sudah rancak maukur wayah pakai standar kalakuan, misalnya "salawas mamarah susu kambing", atawa "salawas manyumbalih unta". Makanya Zaid bin Tsabit mangira-ngira jarak gasan bahati-hati (Imsak) wan bang subuh yaitu salawas mambaca 50 ayat Al-Qur'an.[3]

Dalam kitab Khulashah Al-wafiyyah dijalasakan parkiraan wayah nang dipakai gasan mambaca Al-Qur'an 50 ayat adalah kira-kira 7-8 manit. Balalu hasil nitu dibahas dalam rapat, nang hasilnya disapakati bahuwa wayah nitu dibulatakan jadi 10 manit.[3]

  1. 1 2 Latifah, Wasfa; Jamil, Jamal (2020). "Peranan Ilmu Falak dalam Penentuan Waktu Imsak di Indonesia". Jurnal UIN Alauddin. 1: 136. Diarsipkan dari versi asli Periksa nilai |url= (bantuan) tanggal 2013-08-12. Diakses tanggal 2025-03-14.
  2. 1 2 Anam, Zuhrul (2018). "Imsak, Waktu untuk Mengakhiri Sahur?" (PDF). Pengadilan Agama Sanggau: 2.
  3. 1 2 Faizin, Moh Yusuf; Riza, Muhammad Himmatur; Rahman, Muhammad Habibur (2021). "Dinamika Waktu Imsak pada Jadwal Imsakiyah Ramadan" (PDF). Al-Marshad. 2: 154–155.