Carlos Slim Helú
Carlos Slim Helú (diranakakan 28 Januari 1940; umur 85 tahun) yaitu saikung pangusaha wan filantropis.[1] Inya ni nang baisi parusahaan telekomunikasi Telefonos de México wan Amerika Móvil. Tahun 2011, ia jadi urang panyugihnya nomor 2 seduniaan duitnya US$74 miliar.
Carlos Slim diranakakan di Mexico City, Mexico tahun 1940 matan kuitan Kristen Maronite Julián Slim Haddad wan Linda Helú. Kuitannya kawin bulan Agustus 1926, kaduanya katurunan Lebanon.[1][2][3] Abahnya, pas diranakakan dingarani Khalil Slim Haddad, wayah sidin anum bukah ka Mexico tahun 1902 gasan bajauh pada militer kasar matan Kakaisaran Ottoman.[2] Ampat dingsanak lakiannya sudah badahulu ada di Meksiko.[1]
Kahidupan pamulaan
[babak | babak asal-mulanya]Carlos halus sudah disuruh kuitannya mambaca buku-buku manganai keuangan, akuntansi, wan manajemen. Aset pengganalnya nang diwarisakan ulih abahnya yaitu ilmu investasi. Inya langsung disuruh mambaca laporan keuangan.[4]
Tahun 1951, pas 11 tahun, inya mamugai investasinya wayah manukar surat utang pamarintah wan dapat bunga sekian persen per tahun. Matan sini inya mulai konsep bunga nang babunga.[4]
Wayah umur 12 Carlos inya manukar saham pamulaannya, saham salah sabuting bank pengganalnya di Meksiko, matan situ inya manukar sahamnya tarus sampai 3 tahun imbahnya. Pas umur 15 tahun inya sudah jadi salah sabuting nang baisi saham minoritas di bank ngitu.[4]
Pendidikan wan karir
[babak | babak asal-mulanya]Imbah lulus matan SMA, inya manaruskan ka National Autonomus University of Mexico, inya maambil jurusan teknik sipil. Dapat galar sarjana umur 21 tahun wan bagawi jadi insinyur teknik. Tapi imbah itu inya sadar kakatujuannya ngitu di bisnis wan investasi, jadi inya ampih begawi lalu jadi saurang pedagang saham penuh waktu di bursa saham Meksiko.[4]
Tahun 1965 pas umur 25 tahun, inya dapat untung matan investasinya saurang sampai $400,000 nang memodalinya maulah perusahaan bangaran Inversora Bursatil wan mendaftarakannya ka uturitas kauangan Meksiko. Tahun nang sama inya maulah Grupo Carso nang dijadikana perusahaan indung sagan asetnya di pasar saham, parumahan, maupun parusahaan-perusahaan ampun kuitannya. Setahun imbahnya, inya mangonsolidasiakan anak usahanya berataan, Grupo Carso sudah banilai US$40 juta.[5]
Inya manarusakan gawian investasinya menukari saham-saham matan banyak perusahaan matan berbagai usaha. Sampai tahun 1970-an, Grupo Carso jadi salah satu grup konglomerasi pengganalnya di Meksiko, anak usahanya bergerak di bidang komponen otomotif, aluminium, maskapai penerbangan, barang kimia, rokok, kabel listrik, kertas wan bungkusan, tambang tembaga, ban, semen, toko ritel, hotel, distributor minuman, telekomunikasi, wan jasa kauangan/perbankan. Inya kada tapi banyak mamikirakan detail perusahaannya, nang penting tu 2 buting: parusahaannya baik wan mahasilakan kauntungan konsisten wan aliran duitnya lancar. 2. Harga nukarnya murah.[5]
Perjalanan investasi
[babak | babak asal-mulanya]Maraga inya bainvestasi, maulah inya jadi salah sabuting urang penyugihnya seduniaan kisaran dekade 80-an. Tahun 1982, harga minyak dunia turun banar. Ekonomi Meksiko krisis luar biasa maraga bagantung banar wan ekspor minyak. Banyak parusahaan nang bangkrut, bank-bank dilikuidasai wan nilai hurupan duit Peso turun banar, maulah pasar saham Meksiko anjlok banar.[6] Rahatan ekonomi nang kaya itu, inya tanang hajara maraga menggawi prinsip kuitannya manukari saham nang murah. Wayah krisis 1982 sampai 1985, inya bainvestasi ganal pas sabarataan urang panik wan kaluar matan pasar saham. Rahatan nang kaytu, inya manukari saham perusahaan-perusahaan terkenal di Meksiko, nang kaya Empresas Firisco (parusahaan tambang), Industrias Nacobre (parusahaan pengolahan bijih tembaga), Reynolds Alumino (parusahaan aluminium), Hulera Euzkadi (parusahaan ban terbesar di Meksiko), Bimex (parusahaan hotel), Sanborn Hermanos (parusahaan toko makanan), wan Seguros de Mexico (parusahaan asuransi). Ngaran perusahaan pauncitnya nang disambat tadi tu inya tukari sahamnya saharga US$13 juta, pas tahun 2007 nilai sudah US$1,5 miliar. Sepalihan investasinya diduiti matan aliran dana Cigatam, parusahaan rokok nang diakuisisinya jauh sebelum Meksiko krisis ekonomi.[6]
Tahun 1990 parusahaan indungnya diulahnya IPO di lantai saham Meksiko. Imbah IPO, inya tatap begawian investasi nang kaya biasa. Tahun 2003 inya mulai bainvestasi ka pasar saham Amirika Serikat, nang maulahnya jadi makin dipinandui ulih urang. Wayah itu, inya sudah mendominasi pasar saham Meksiko sampai kadada lagi parusahaan nang baik wan murah nang kawa ditukarinya. Tahun 2003, inya mulai masuk dalam daftar majalah Forbes jadi salah sabuting matan 100 urang sugih di dunia. Cuma perlu 4 tahun sekira digalari urang penyugihnya di dunia versi Majalah Forbes.[6]
Tahun 2008 Amirika Serikat krisis ekonomi nang jadi penyebab Bursa Wall-Street gugur, dimanfaatkannya gasan menukari banyak saham di New York. Salah sabuting saham nang ditukarinya wayah itu yaitu 6.4% saham New York Times Company nang nilainya US$ 27 juta. Babarapa tahun imbah itu inya jadi pemegang saham kendali di parusahaan ngitu. Tahun 2012 inya bealih ka Eropa menukari Real Oviedo, ditarusakan lawan manukari parusahaan telekomunikasi, Telekom Austria. Tahun 2013 investasinya makin baluas ka perusahaan jasa menggaduh penjara di Meksiko. April 2015 inya bainvestasi US$230 juta ka usaha minyak wan gas maulah perusahaan Carso Oil & Gas.[7]
Jujuhutan
[babak | babak asal-mulanya]- ^ a b c "Biography". Carlos Slim Helú. Diakses tanggal February 19, 2011.
- ^ a b Bone, James (11 March 2010). "Mexican mogul Carlos Slim got his big break in sell-off of national telephone firm". The Times. London. Diarsipkan dari versi asli tanggal 2011-06-11. Diakses tanggal 2011-06-17.
- ^ Padgett, Tim (11 July 2007). "Carlos Slim's Embarrassment of Riches". United States. Diarsipkan dari versi asli tanggal 2011-06-23. Diakses tanggal 2011-06-17.
- ^ a b c d Hidayat, Teguh (Maret 2017). Value Investing: Beat The Market in Five Minutes!. Jakarta: PT. Elex Media Komputindo. hlm. 160–161. ISBN 978-602-04-0180-5.
- ^ a b Hidayat, Teguh (Maret 2017). Value Investing: Beat The Market in Five Minutes!. Jakarta: PT. Elex Media Komputindo. hlm. 162–163. ISBN 978-602-04-0180-5.
- ^ a b c Hidayat, Teguh (Maret 2017). Value Investing: Beat The Market in Five Minutes!. Jakarta: PT. Elex Media Komputindo. hlm. 162–163. ISBN 978-602-04-0180-5.
- ^ Hidayat, Teguh (Maret 2017). Value Investing: Beat The Market in Five Minutes!. Jakarta: PT. Elex Media Komputindo. hlm. 164–165. ISBN 978-602-04-0180-5.