Cadar

Cadar asalnya tumatan bahasa Persia “chador” nang baarti tinda. Cadar baarti pakaian bibinian nang manutupi sabukuan bagian awak, tumatan hujung kupala sampai hujung batis. Lamun urang India, Pakistan, wan Bangladesh manyambatnya “purdah”, samantara ulih bubuhan Badui di Mesir wan sakitar Teluk Persia manyambatnya Burqu (hususnya gasan manutupi muha).^[1]

Dalam Kamus Ganal Bahasa Indunisia (KBBI), cadar baarti kain panutup kupala atawa muha gasan bibinian. Samantara dalam Bahasa Arab, cadar disambat Niqab, dalam kamus Al-Munawir baarti kain gasan manutupi muha. Karancakannya niqab diulah tumatan kain nang tapisah dari kain hijap, lantaran pungsi utamanya gasan manutupi muha bibinian, atawa malangkapi bagian muha nang kada tatutup ulih hijap.

Mudil Niqab kada banyak, ada nang salambar kain wara gasan manutupi bawah mata sampai ka bawah dagu, ada jua nang salambar kain ganal nang kawa salajur dipakai gasan karudung atawa jubah gasan manutupi sabukuan awak bibinian, jadi lapisan luar nang manutupi pakaian lapisan dalam, nang kalihatan matanya haja.^[1]

Sajarah Cadar

Cadar atawa niqab tamasuk salah satu busana nang dipakai ulih sapalih bibinian wayah jaman Jahiliyah. Gaya bapakaian ngini batarusan sampai wayahnya Islam datang. Nabi Muhammad SAW kada manyualakan parihal putungan busana nitu, tapi kada mawajipakan jua, atawa manyuruh banar pamakaian cadar gasan bibinian. Pabila cadar dianggap sabagai pakaian nang kawa manjaga martabat bibinian wan wasilah gasan manjaga kalangsungan hidupnya, nangkaya ujar urang, tantu Nabi manyuruh ka bininya atawa kaluarganya nang paling parak wan sidin dahulu.^[1]

Sapanjang sajarahnya, Nabi kada mawajipakan mamakai cadar, baik ulih bininya atawa bini sahabat-sahabat. Ngini jadi bukti bahuwa cadar sudah ada di wayah masuknya Islam, tagal cuma dianggap sabagai salah satu putungan pakaian yang dipakai husus ulih bibinian. Kabiasaan nang dicuntuhakan ulih Ummahat al-Mukminin (bini-bini Nabi), buhannya mamakai jilbab (panutup kapala) di dalam rumah, tagal bahanu manutupi sabukuan awak wan muha buhannya pabila kaluar pada rumah.

Dalam hadis nang diriwayatakan ulih Ibnu Majah, Aisyah meriwayatakan bahuwa inya baucap: "Wayah Nabi SAW sampai di Madinah, pas rahatan sidin manikahi Shafiyyah binti Huyay, bibinian-bibinian Anshar datang mahabarakan kadatangan Nabi. Balalu ulun (Aisyah) manyamar mamakai niqab (cadar) lalu umpat manyambut sidin. Lalu Nabi maniring ka kadua mata ulun wan pinandu lawan ulun. Ulun bapaling muha mahindari sidin wan bajalan lakas-lakas, tagal Nabi manuntii ulun." (HR. Ibnu Majah)^[1]

Cadar dalam 4 Mazhab

Imam Hanafi

Dalam Mazhab Hanafi, cadar hukumnya sunnah nang dianjurakan. Sunnah nitu jadi wajip pabila malihatakan muha sampai maulah ngaran jadi kada baik. Al-Imam Muhammad ‘Alla uddin, ulama tumatan mazhab Hanafi manyambat: “Sabukuan awak bibinian nitu aurat, kacuali muha wan talapak tangan bagian dalam." Dalam sabuting riwayat (hadis), disambatnya talapak tangan bagian luar jua aurat, damintu pula suara bibinian, tagal lain aurat bila di hadapan bibinian lain. Pabila manuju ka pitnah, hanyar dilarang manampaiakan muhanya di hadapan lalakian.

Imam Maliki

Bubuhan ulama Mazhab Maliki, ada nang mawajipakan bibinian Muslimah mamakai cadar, kacuali pas kaadaan darurat, wan ada jua nang manyambat bahuwa hukumnya sunnah, tagal manjadi wajip bila bibinian nitu baisi rupa nang bungas. Parihal ngini, ulama tumatan mazhab Maliki Al-Qurthubi suah manyambat, “bila bibinian baisi rupa nang bungas wan takutan muha wan talapak tangannya bisa manjadi pitnah, inya harus manutupi muhanya. Bila inya bibinian tuha atawa muhanya kada bungas, bulih aja manampaiakan muhanya."

Imam Syafi'i

Mazhab Syafi'i maanggap panting gasan bibinian muslimah mamakai jilbab di hadapan lalakian nang lain mahram. Mazhab ngini nang banyak diumpati ulih urang Indunisia. Ulama tumatan mazhab Syafi'i, Asy Syarwani manyambat, “Ada tiga janis aurat ampun bibinian: (1) dalam sambahyang, batas aurta bibinian yaitu muha wawn talapak tangan, (2) aurat bibinian di hadapan lalakian nang lain mahram yaitu sabukuan awak tamasuk muha wan talapak tangan, (3) aurat bibinian bila lawan mahramnya, sama wan lalakian, yaitu antara pusat awan paha."

Imam Hambali

Imam Ahmad bin Hambal tagas banar mawajipakan cadar gasan bibinian muslimah. Sidin baucap, “sabukuan awak bibinian nitu aurat, tamasuk kukunya.” Cadar wajip dipakai ulih bibinian muslimah pabila sudah akil baligh, di hadapan urang nang lain mahram.^[1]

Cadar di Indunisia

Cadar masih jadi pambahasan nang panas di kalangan bubuhan Islam. Ulama paguruan masih mandabat parihal dalil-dalil wajip atawa kadanya mamakai cadar. Lain pada itu, pamakaian cadar jua masih banyak mandapat panulakan ulih masarakat Indunisia.

Wayah pamarintahan Orde Baru, pamakaian jilbab wan cadar suah ditantang banar. Pamarintah sampat mangaluarakan paraturan kada bulih mamakai jilbab atawa cadar di instansi mana-mana, antah di sakulahan atawa di wadah bagawi. Imbah masa ripurmasi (reformasi), hanyar bibinian muslimah dibulihakan mamakai jilbab gasan idintitas bahuwa inya tu Muslim.^[1]

Jujuhutan

^ ^a ^b ^c ^d ^e ^f Faruqi, Muhammad Syihab Al; Kahf, Maulana Muzayyin Al; Rahmah, Maulida Fitria (2023-06-30). "PEMAHAMAN CADAR, HIJAB, DAN BURQA DALAM PERSPEKTIF ISLAM". Jurnal Ilmu Al-Qur'an dan Tafsir (JIQTA) (dalam bahasa Inggris). 2 (1): 45–69. doi:10.36769/jiqta.v2i1.343. ISSN 2828-7339.

[:0-1] ^ ^a ^b ^c ^d ^e ^f Faruqi, Muhammad Syihab Al; Kahf, Maulana Muzayyin Al; Rahmah, Maulida Fitria (2023-06-30). "PEMAHAMAN CADAR, HIJAB, DAN BURQA DALAM PERSPEKTIF ISLAM". Jurnal Ilmu Al-Qur'an dan Tafsir (JIQTA) (dalam bahasa Inggris). 2 (1): 45–69. doi:10.36769/jiqta.v2i1.343. ISSN 2828-7339.

[1]