Burka
 | Artikal ini kada baisi kategori/tumbung atawa baisi kategori/tumbung sadikit banar. Ganii lawan cara manambahi kategori/tumbung nang sasuai. Janaki artikal nang sahuaran gasan manantuakan apa kategori/tumbung nang sasuai. Tulung ganii Wikipidia gasan manambahakan kategori/tumbung. |
Burka atawa Burqa diambil tumatan bahasa Arab nang baarti pakaian Islam gasan bibinian nang manutupi sabukuan awak, mulai atas kupala sampai hujung batis. Al-Burqa nitu bantuk tunggal dari baraqi, nang artinya salambar kain sagi ampat nang dipakai di bawah mata, manutupi bagian bawah hidung, muntung sampai dada.[1]
Burka atawa Burqa asalnya tumatan istilah bahasa Arab “al-burqu” nang baarti sapu tangan, kain hirang atawa kain putih. Burqa nitu manutupi sabukuan awak, tamasuk kupala wan muha, manyisakan lubang halus haja gasan mata.[2]
Sajarah Burka
[babak | babak asal-mulanya]Urang Islam kabanyakan maanggap bahuwa burka asalnya tumatan budaya masarakat Arab. Tagal bubuhan pakar manjalasakan bahuwa burka nitu sabujurnya maniru urang Persia nang maumpati agama Zardasyt, agama nang maanggap bahuwa bibinian nitu mahluk nang kada suci, jadi harus ditutupi muntung wan hidungnya pakai kain sakira bakas pahinakan buhannya kada marigati api suci nang wayah nitu jadi sasambahan buhan Persia lawas.[1]
Panutup kapala gasan bibinian sudah dipinandui masuk dalam ajaran Yahudi, Nasrani, Majusi, ada jua nang masuk dalam kabudayaan Hindia, Romawi, sampai Persia. Tagal bubuhan Arab hanyar mamakai tradisi burka ngini pas masuk agama Islam, malalui al-Qur'an surah An-Nur ayat 31 wan Al-Ahzab ayat 59. Urang Arab bahari bibas bapandiran antara lalakian wan bibinian sabalum Islam datang, bibinian mamakai panutup kupala awan karudung, tagal bagian balakangnya haja nang ditutupi, samantara gulu, dada wan kangkalungnya masih kalihatan. Lantaran ihwal nitu kawa manjadi sasambatan (pitnah) wan mamancing kajahatan, balalu Allah manurunakan parintah manutupi aurat.[2]
Riwayat mangisahakan bahuwa bini Rasul Muhammad SAW suah kaluar rumah wayah malam ari gasan buang hajat, balalu urang munafiqun mangganggu wan manyakiti sidin lantaran buhannya maanggap sidin nitu hamba sahaya. Imbah mangatahui nitu, Rasul managur buhan munafiqun wan turun QS. Al-Ahzab ayat 59 nang baisi parintah manutup aurat lawan pakaian nang tatutup, sakira kada kawa dibidakan antara bibinian nang mardika awan budak hamba sahaya.[2]
Burka Wayah Ini
[babak | babak asal-mulanya]Burka wayah ini jadi pakaian bibinian nang rancak dipakai di nagara-nagara Islam. Afghanistan pas wayah dikupalai Taliban sakitaran tahun 2021 mawajipakan bibinian mamakai burka, padahal sabalumnya buhannya kada wajip manutupi muha.[3] Kajadian nitu maulah panjualan burka jadi banaik, haraga burka umpat naik jua sampai sapuluh kali lipat. Saking larangnya, urang nang kada mampu tapaksa maulah burka tumatan ulas tilam, lantaran bila katahuan kada mamakai burka bisa dihukum.[4] Hukumannya kada gasan bibinian haja, tagal lalakian di kaluwarganya bisa ditagur, dikiyau ulih pamarintah, atawa bisa dikurung panjara salawas talu hari.[5]
Tagal ada jua nagara nang justru kada mambulihakan bibinian mamakai burka, misalnya Turki, Austria, Denmark, Swiss, Prancis, Belgia, Bulgaria, Belanda, Tajikistan, Chad, Gabon, Kamerun, Republik Kongo, Maroko, Cina, wan Srilanka. Larangan ini kada sakadar basa-basi haja, adau jua pamarintah nang wani mambari hukuman gasan urang nang mamakai burka. Alasan kada bulih mamakai burka mulai dari alasan agama sampai hak asasi bibinian, wan jua alasan kaamanan wan kasalamatan.[6]
Jujuhutan
[babak | babak asal-mulanya]- 1 2 Alanka, Fadly; Mustafa AQ, Ilham; Riyani, Fadia Luthfi; Auliya, Hanifatul; Muhyi, Asep Abdul (2023). "Problematika Jilbab Cadar dan Burqa pada Masyarakat Indonesia: Analisis Metode Tafsir Maudhu'i". Gunung Djati Conference Series. 25: 225. Diarsipkan dari versi asli Periksa nilai
|url=(bantuan) tanggal 2013-08-12. Diakses tanggal 2025-02-27. - 1 2 3 Sarpika; Jamilah, Sani; Abdurrahman, Wajdi Hanif; Rahman, Tengku Faisal (2023-06-24). "Cadar, Hijab, dan Burqa dalam Al Quran: Analisis Tafsir Maudhu'i". ReligioTransdis: Jurnal Kajian Agama Lintas-Bidang (dalam bahasa Inggris). 1 (1): 1–11. Diarsipkan dari versi asli tanggal 2025-02-27. Diakses tanggal 2025-02-27.
- ↑ "Penjualan Burqa di Afghanistan Laris Sejak Taliban Berkuasa". Tempo (dalam bahasa Indonesia). 2021-09-04. Diakses tanggal 2025-02-27.
- ↑ "Perempuan Afghanistan Ramai Beli Burqa, Harga Naik hingga 10 Kali Lipat". kumparan (dalam bahasa Indonesia). Diakses tanggal 2025-02-27.
- ↑ "Taliban to force Afghan women to wear face veil" (dalam bahasa Inggris). 2022-05-07. Diakses tanggal 2025-02-27.
- ↑ "Countries Where Wearing a Burqa is Mandatory 2024". worldpopulationreview.com. Diakses tanggal 2025-02-27.