Batamat Quran (budaya)
Batamat Qur'an atawa Bakhatam Qur'an ialah salah sabuting tradisi nang manamatakan atawa manuntungakan bacaan kitab suci umat Islam, Al-Qur'an. Tradisi ngini baasal tumatan Nabi Muhammad saw. lawan bubuhan sahabatnya nang rancak manuntungakan atawa manamatakan Al-Qur'an wayah waktu tartantu.[1]
Batamat Qur'an ngini bamula tradisi nang baasal tumatan punduk pasantrin tahfiz. Tradisi ngini imbahnya diumpati ulih masarakat umum di Indunisia. Batamat Qur'an di pasantrin tahfiz rancak digawi liwat bil ghaib atawa bahapal, tagal batamat Qur'an di masarakat umum mamakai cara bin nash atawa malihati mushaf. Tradisi batamat Qur'an imbahnya manyabar di barbagai banua di Nusantara.[2]
Tradisi
[babak | babak asal-mulanya]Dalam tradisi Banjar, batamat Qur'an rancak digawi gasan kakanakan[3], urang anum, atawa babujangan nang hanyar tatambaian manuntungakan sabarataan bacaan Al-Qur'an sabanyak 30 juz.[4] Kakanakan nang mandapat parayaan batamat Qur'an rancak baumur antara sambilan sampai dua walas tahun.[5] Di umur ngini, masarakat Banjar manyuruh kakanakan mambaca wan manuntungakan Al-Qur'an, gasan lalakian jua bibinian.[6] Surah nang dibaca mula'i Adh-Dhuha (QS: 93) sampai An-Naas (QS: 114) sacara tartil.[5]
Salain digawi gasan kakanakan, urang anum, wan babujangan nang hudah manuntungakan sabarataan bacaan Al-Qur'an sawagai bantuk panghargaan wan kahimungan atawa kaungahan, batamat Qur'an matan urang Banjar jua rancak digawi wayah parayaan lain gasan calun pangantin (lalakian wan bibinian), batunggu kubur[7], maulid, tadarus wayah bulan Ramadan[8], batamat masal.[9][10]
Urang Banjar harus manyiapakan babarapa hal wayah handak batamat Qur'an, mula'i matan Al-Qur'an, lapik duduk, payung kambang, lakatan bahinti (lakatan nang banyiur purut nang bagula habang), hintalu (ayam atawa itik) bajarang nang bawarna habang anum, gulai (ayam atawa itik)[7], banyu putih dalam butul, wan wadai nang bapariasi, kaya dodol, wajik, tapai. Wayah batamat Qur'an jua musti manyaru guru ngaji atawa ustad nang maajarakan Al-Qur'an ka kakanakan di dairah situ, urang sakitar, wan kakanakan nang pacangan umpat dalam acara batamat tadi.[9]
Dalam tradisi batamat Qur'an, ada payung kambang nang marupakan paring bakarangka, babantuk lingkaran, wan batungkat nang mirip lawan sabuting payung. Payung ngitu rancak diulah tasusun bilah-bilah paring nang bajumlah ganjil. Jumlah hitungan ganjil ngini dalam ajaran Islam manyataakan Allah katuju hitungan nang ganjil wan ngaran-Inya bajumlah ganjil jua.[9]
Imbahnya, paring bakarangka wan babantuk payung dihiasi lawan kartas minyak atawa kartas warna-warni gasan manukupi danul atas rangka. Kartas nang rancak dipakai bawarna habang wan putih. Salain ngitu, paring bakarangka tadi digatungi kambang barinting, mula'i matan kambang mawar, kananga, campaka, kacapiring, sampai malati. Ada jua hiasan duit kartas, caramin halus. Payung kambang ngini kina dipakai gasan manaungi urang nang handak batamat Qur'an, takananya diarak baimbai wan urang lain sabalum batamat Al-Qur'an.[9]
Jujuhutan
[babak | babak asal-mulanya]- ↑ Rafi, Muhammad (2022-02-12). "Tradisi Batamat Alquran di Kalangan Masyarakat Banjar". Tafsir Al Quran | Referensi Tafsir di Indonesia (dalam bahasa Indonesia). Diakses tanggal 2026-03-20.
- ↑ Fauzi, Ahmad Nailul (30 Desember 2019). "Komodifikasi Agama terhadap Pembacaan (Khataman) Al-Qur'an Air Kemasan KH-Q PT Buya Barokah". Diya Al-Afkar: Jurnal Studi Al-Quran dan Al-Hadis. 7 (2): 289.
- ↑ "FilmIslami.kemenag.go.id | Cahaya dalam Setiap Cerita". filmislami.kemenag.go.id. Diakses tanggal 2026-03-21.
- ↑ "Wardatun Nadhiroh – Pustaka Diniyah" (dalam bahasa Inggris). Diakses tanggal 2026-03-20.
- 1 2 "Batamat Qur'an". NU Online (dalam bahasa Indonesia). Diakses tanggal 2026-03-21.
- ↑ Mundzir, Chaerul (10 Mei 2014). "Nilai-Nilai Sosial dalam Tradisi mappanre Temme' di Kecamatan Tanete Rilau, Kabupaten Barru". Rihlah: Jurnal Sejarah dan kebudayaan. 1 (1): 69–80.
- 1 2 Hermawan, Indra. "Batamat Qur'an, Simbol Rasa Syukur Urang Banjar - RRI.co.id". rri.co.id - Portal berita terpercaya (dalam bahasa Inggris). Diakses tanggal 2026-03-21.[permanent dead link]
- ↑ "Tata Cara Khataman Al-Qur'an: Susunan Bacaan dan Doa". NU Online (dalam bahasa Indonesia). Diakses tanggal 2026-03-21.
- 1 2 3 4 Tradisi Batamat Al Qur'an di Tanah Banjar. 2022. ISBN 9786236268261.
- ↑ "Kesungguhan Spirit Batamat dan Etika Peradilan". Kesungguhan Spirit Batamat dan Etika Peradilan (dalam bahasa Inggris). Diakses tanggal 2026-03-21.[permanent dead link]