Bandar Udara Tjilik Riwut

Lapangan Tarabang Tjilik Riwut (IATA: PKY, : WAGG), sabalumnya bangaran Bandar Udara Panarung, yatu sabuting bandara di Palangkaraya, Kalimantan Tengah, Indunisia. Bandara ngini adalah bandara pangganalnya di Kalimantan Tengah. Bandara ngini jua marupakan Embarkasi Calon Jamaah Haji Kalimantan Tengah. Wayah ini Bandara Tjilik Riwut masih dalam pambangunan Hangar Lion Air wan Lion Air Flying School nang dikalula ulih Lion Air. Tahun kaina landasan pacu di bandara ngini dipanjangakan jadi 3.000 x 45 meter (9.843 ft × 148 ft). Wayah ini jua sudah dibangun wan dirasmiakan tarminal hanyar Bandar Udara Tjilik Riwut nang luasnya 29.124 mitir parsagi lawan tingkat kadua wan kawa manampung 2.200 urang. Salain itu, Bandar Udara Tjilik Riwut jua disudurakan gasan jadi bandara intarnasiunal.

Sajarah

Sabalumnya Bandar Udara Tjilik Riwut baisi ngaran Palabuhan Udara Panarung nang badiri wayah tanggal 1 Mei 1958, dirasmiakan ulih Résident Kalimantan Tengah yatu Bapak Tjilik riwut. Wayah itu kawa dipakai gasan mandarat pasawat panarbangan tipe Twin Otter (tumatan TNI-AU). Tanggal 24 Siptimbir 1973, Palabuhan Udara Panarung ulih Pamarintah Dairah Kalimantan Tengah disarah-tarimakan ka Direktorat Jenderal Perhubungan Udara Departemen Perhubungan RI. Samanjak nitu tanggung jawab Pamarintahan Dairah Kalimantan Tengah bapindah sahabisnya ka pamarintah pusat, gasan tindak lanjut tumatan sarah tarima ulih Menteri Perhubungan Republik Indonesia Bapak Prof. Dr. H. Emil Salim, S.E., M.A., Ph.D. nang manunjukakan Palabuhan Udara Panarung Palangka Raya sabagai palabuhan udara gasan lalu lintas udara dalam nagari (Domestik) nang mamakai pasawat janis Fokker 27.

Palabuhan Udara Panarung manjadi Bandara Tjilik Riwut baimbai lawan paringatan Hari Pahlawan Nasiunal tanggal 10 Nupimbir 1988. Ngaran Tjilik riwut (mantan Gubernur Kalimantan Tengah) diabadikan gasan ngaran bandara ibu kota Prupinsi Kalimantan Tengah Palangka Raya nang sabalumnya bangaran Palabuhan Udaran Panarung. Panggantian ngaran jadi Bandar Udara Tjilik Riwut wan panandatanganan prasastinya digawi ulih Menteri Perhubungan Republik Indonesia Bapak Letnan Jenderal TNI (HOR) (Purn.) Ir. H. Azwar Anas. Panggantian ngaran ngitu sasuai lawan usulan Gubernur Kalimantan Tengah, DPRD Kalimantan Tengah wan tanggapan Menteri Dalam Negeri. Pangabadian ngaran ngitu lantaran Tjilik Riwut adalah sabuting Pahlawan Nasiunal (Kaputusan Presiden Republik Indonesia tanggal 6 Nupimbir 1988 No.108/TK/1988).

Wayah tanggal 28 Marit 2019, tarminal hanyar bandara ngini mulai bauperasi, saraba kagiatan panarbangan di terminal lawas bandara dipindah ka tarminal hanyar bandara.

Pasilitas wan Pangambangan

Gasan ma'akomodasi paningkatan banyak urang, ada tarminal hanyar diulah gasan mangganti nang lawas. Pambanganunan dimulai wayah tahun 2014 wan mamakan waktu 4,5 tahun gasan manuntungakan. Tarminal hanya baisi luas 29.124 m², jauh labih ganal pada tarminal lawas nang baluas 3.865 m². Tarminal ngini baisi kapasitas nang kawa sampai 4,5 juta urang saban tahunnya. Tarminal ngini jua dilangkapi lawan tiga jambatan pasawat, nang bahari dipakai di Bandara Internasiunal Soekarno-Hatta. Salain nitu, paruyik ngini malibatakan pambangunan taxiway hanyar wan mangganali apron gasan maisi labih banyak pasawat, jua mamanjangi landasan pacu jadi 2.600 m. Tutal inpestasi kikira 700 miliar Rupiah dialukasikan gasan tarminal wan inprastruktur takait. Tarminal hanyar ngini tuntung wan dirasmiakan ulih Presiden Joko Widodo wayah 8 April 2019.

Angkasa Pura II sudah ma'alukasikan tambahan 480 miliar Rupiah gasan pruyik pangambangan labih lanjut di bandara, tamasuk rancana gasan mamanjangi landasan pacu sampai 400 m jadi 3.000 m gasan ma'akumudasi pasawat libar. Pangambangan lain nang diusul akan wan lagi dipikirakan tamasuk pambangunan pasilitas MRO (Pamaliharaan, Parbaikan, wan Overhaul), tarminal kargu hanyar, hutil bandara, wan pasilitas pandukung nang lain.