Badamaran
Badamaran marupakan sabuting tradisi bubuhan Banjar pas manyambut bulan Ramadan atawa bulan umat Islam bapuasaan nang wajib digawi saban tahunnya nang barupa manyalaakan lampu panarangan tradisiunal di muha atawa tungkaran rumah, halaman, atawa sapanjang jalan di disa saurang.[1] Inya ngini budaya nang hudah ada bahari kala di dalam masarakat urang Banjar badiam di dairah Kalimantan Salatan, hususnya di dairah Banua Anam, yaitu anam kabupatin di utara Kalimantan Salatan.[2]
Tradisi ngini mambawa wan manyalaakan lampu nang kaya lampiun atawa mirip Tanglong, lilin, lampu nang pakai minyak tanah, ubur, jua mancucul gatah damar di malam ngitu. Gawian ngini rancak digawi pas malam ka-21 Ramadan, yaitu malam Saribu Bulan (Lailatur Qadar) sampai Hari Raya Pitrah.[1] Urang tatuha bahari mangajarakan ngini gasan manyambutnya kahimungan wan malam ngitu diisi lawan ibadah.[3]
Istilah Badamaran
[babak | babak asal-mulanya]Badamaran diambil matan kuya "Damar", yaitu sabuting puhun kayu karas lawan ngaran latinnya agathis dammara nang kawa disadap di danul kulimbit batangnya gasan diambili gatahnya nang rancak disambat gatah damar, gatah nang kagunaannya banyak wan harganya larang banar.[4]
Sabalum listrik masuk ka Kalimantan, gatah damar jadi salah sabuting bahan cuculan utama matan alam gasan panarangan nang dipakai ulih masarakat Kalimantan. Karana harganya rilatip larang, maka kada saban ari urang-urang mancuculnya gasan manarangi aktipitas pas malamnya.[4]
Rancaknya pas babarapa acara haja nang mamakai gatah damar dicucul sawagai bahan cuculan gasan manarangi malam nang kadap, salah sabuting nang jadi tradisi ialah manarangi sapanjang malam di bulan Ramadan, nang ngitulah disambat masarakat sawagai aktipitas Badamaran.[4]
Sajarah Badamaran
[babak | babak asal-mulanya]Kadada nang tahu banar kanapa budaya ngini hudah ada pas bahari kala di dalam masarakat nang badiam di pulau taganal matan Indunisia, tagal pakiraan bacungul imbah ulama bahari maanjurakan umat Islam supaya manyambutakan datangnya Ramadan lawan mambarii panarangan di muha atawa tungkaran rumah saurang.[1]
Salawas parkambangan zaman, pas gatah damar ngalih diambil, maka urang-urang satampat manggantii inya lawan gatah karing nang imbah dicucul lawan api lalu banyala jadi ubur.[1] Supaya nyaman manyalaakan gatah ngitu, diulahakan wadah nang taulah matan gadang pisang, palapah daun rumbia, atawa mamakai paring.[5][6]
Tampat mambakar gatah damar ngitu gin bantuknya macam-macam, kaya kapal tarabang, inguan, rumah-rumahan, sampai gatah-gatah nang basusun di situ kaliatan bungas.[1]
Dalam masarakat Banjar bahari, Badamaran ada karana panarangan urnamin nang dipakai yaitu palita lampu matan gatah kayu damar. Tagal pas 25 tahun balalu, tradisi ngini handak kada timbul lagi salawas damar langka wan digantii lawan palita matan sumbu kain nang diandak di ubur nang tabuat paring, butul bakas, atawa kaling kamasan lawan baisi minyak tanah.[7][8]
Badamaran ngini dibantuk mula'inya gasan mangagungakan bulan puasa, wan mambungasi pamandangan disa. Tradisi ngini hudah kada banyak lagi nang manggawinya karana damar nang digagai hudah ngalih banar wayahini.[9] Sawagai ngarannya, gatah puhun damar sawagai bahan utama manyalaakan api bahari. Minyak tanah gin balum nyaman ditamui. Nang panting wahini, tarangnya ngitu malabihi cahaya api matan ubur. Makanya, tradisi ngini mula'i hilang di tangah zaman.[2] Pas acaranya gin ada atraksi bila diri yaitu Kuntau, bamadihinan, wan bamakanan has Banjar, kaya lontong wan apam surabi.[3]
Tujuan utama bahari adanya Badamaran adalah umat Islam nyaman tulakan ka masigit atawa langgar gasan sambahyang tarawih bajamaah, atawa manggawi ibadah nang lain.[1]
Jujuhutan
[babak | babak asal-mulanya]- 1 2 3 4 5 6 Zainuddin, Hasan. "Budaya "Badadamaran" saat Ramadhan nyaris menghilang". ANTARA News Kalimantan Selatan. Diakses tanggal 2026-02-20.
- 1 2 Zakaria, izak-Indra. "Hidupkan Tradisi yang Mulai Ditinggalkan - Prokal". Hidupkan Tradisi yang Mulai Ditinggalkan - Prokal (dalam bahasa Indonesia). Diakses tanggal 2026-02-20.
- 1 2 "Festival Badamaran, Merawat Tradisi – Teras7.com" (dalam bahasa Indonesia). 2019-05-24. Diakses tanggal 2026-02-20.
- 1 2 3 "Tradisi Badadamaran dan Tanglong, "Penunjuk Jalan" Menuju Malam 1000 Bulan". KOMPASIANA (dalam bahasa Indonesia). 2022-04-22. Diakses tanggal 2026-02-20.
- ↑ "Masyarakat Banjar Lestarikan Budaya Nyalakan Obor di Malam Ramadan". Tribunnews.com (dalam bahasa Indonesia). 2026-02-20. Diakses tanggal 2026-02-20.
- ↑ Niam, Mukafi (2008-09-09). "Badadamaran Suku Banjar Saat Ramadhan". NU Online. Diakses tanggal 2026-02-20.
- ↑ "Lestarikan Tradisi Budaya Tanglong, Dewan Kesenian Balangan Gelar Kegiatan Ini". Banjarmasinpost.co.id (dalam bahasa Indonesia). Diakses tanggal 2026-02-20.
- ↑ "Festival Tanglong Balangan. Menyambut Bulan Ramadhan dan Malam Lailatur Qadr dengan Kemeriahan Lampion Warna Warni. » Budaya Indonesia". budaya-indonesia.org. Diakses tanggal 2026-02-20.
- ↑ Sanusi, Didi G (2019-05-25). "Malam Terakhir Ramadhan, Pemkot Banjarbaru Lestarikan Tradisi Badamaran". Jejakrekam. Diakses tanggal 2026-02-20.