Abaya
 | Artikal ini kada baisi kategori/tumbung atawa baisi kategori/tumbung sadikit banar. Ganii lawan cara manambahi kategori/tumbung nang sasuai. Janaki artikal nang sahuaran gasan manantuakan apa kategori/tumbung nang sasuai. Tulung ganii Wikipidia gasan manambahakan kategori/tumbung. |
Abaya adalah pakaian tradisiunal nang rancak dipakai ulih urang Arab sampai jadi simbul idintitas babuhan masarakat Arab. Abaya nitu busana muslim nang ciri-cirinya batangan panjang wan putungan awak lunggar, panjangnya sampai hujung batis atawa labih, rancak dipakai ulih bibinian wayah hari raya.[1]
Sajarah
[babak | babak asal-mulanya]Abaya sudah cungul wan dipakai bibinian Muslim tumatan abad ka-7, wayah kabangkitan agama Islam. Putungan pakaian ngini maambil inspirasi tumatan kain panutup nang dipakai bibinian Muslim rahat baibadah. Sakira tanyaman (praktis), diulah babarapa panyasuaian sampai jadi abaya nang babantuk satu putungan libar wan kawa manutupi awak bibinian, sampai ka hujung tangan wan hujung batis.
Banyak jua urang nang parcaya bahuwa abaya sudah cungul jauh sabalum kabangkitan agama Islam. Habarnya abaya sudah ada tumatan jaman Mesopotamia. Wayah nitu, bibinian mamakai pakaian nang manutupi samunyaan awaknya.
Barapa tahun tadahulu, abaya dipinandui baisi sabuting warna haja, yaitu hirang. Tagal sairing jaman, abaya wahini sudah kawa ditamui dalam banyak warna wan mutip, ada jua nang pakai bordir sakira kalihatan miwah.[1]
Abaya sasain dipinandui urang wayah Raja Abdul Aziz al-Saud mambariakan abaya gasan kapala suku nang ada di sakitar karajaan, wayah tahun 1930-an, pas nagara ngini jadi satu di bawah pimpinan Raja al-Saud, abaya mulai manggantiakan pakaian bubuhan sana, apalagi Arab Saudi baisi aturan nang kantat parihal pakaian.[2]
Tumatan tahun 2008, abaya dijadiakan pakaian nasiunal Uni Emirat Arab, nang maulah nagara ini jadi pusat abaya ulih banyak nagara lain. Nang pamulaannya abaya bawarna kadap, mulai tahun 2008 nitu jua abaya tradisiunal diubah ulih parancang busana UEA gasan manarik kahandak bibinian nang katuju bawarna wan bamutip.[2]
Tagal wayah jaman sabalum Islam, sabujurnya sudah ada pakaian nang mahirip wan abaya, yaitu pakaian urang-urang Arab Badui nang baputungan jubah wan warnanya kadap. Salain nitu ada jua pakaian lunggar gasan manutupi sabukuan awak wan dipakai ulih kalangan urang sugih haja, nang rancak disambat jilbab. Pakaian ngini asalnya tumatan urang Persia nang dikalahakan ulih Bizantium, balalu pakaian buhannya lakas ditiru ulih rakyat jalata wan manyabar ka sabarataan wilayah nang dikalahakan Bizantium.[2]
Pungsi
[babak | babak asal-mulanya]Salain gasan manutupi awak bibinian, sabalum wayah kajayaan agama Islam, abaya jadi simbul satatus bibinian. Bibinian nang manutupi awaknya pakai abaya wan cadar (manutupi muha) nitu digambarakan sabagai bibinian nang paham agama. Ada jua nang mamadahakan bahuwa abaya wan cadar nitu jadi simbul bibinian nang sugih atawa hidup dalam kamiwahan, lantaran bibinian nang kada bagawi wan hidup ngalih saharusnya kada kawa manukar kain, manukar abaya, wan kain cadar gasan manutupi muhanya.
Lamun damintu, salawas ribuan tahun, kurang labih 4000 tahun, pungsi abaya sasain baubah, tumatan satatus susial, gasan manutup aurat, sampai wayah ini jadi pamakaian nang dikatujui ulih bibinian.[1]
Bibinian Arab wayah ini kaluar rumah mamakai abaya nang manutupi kapala, awak wan muha. Salain gasan malindungi tumatan sangatan sinar matahari, manjaga kalambaban kulit, wan jua kawa malindungi dari pasir nang ada di wilayah Arab.[2]
Jujuhutan
[babak | babak asal-mulanya]- ^ a b c Media, Kompas Cyber (2022-04-24). "Mengenal Sejarah Abaya, Pernah Jadi Simbol Status Sosial Perempuan". KOMPAS.com. Diakses tanggal 2025-02-26.
- ^ a b c d Marifatullah, Alfida (2017-09-25). Pakaian, Negara, dan Identitas: Abaya Di Uni Emirat Arab Pasca Oil Booming II (2000-2010 (Tesis) (dalam bahasa Indonesia).