Masigit Pusaka Banua Lawas
.jpg)
Masigit Pusaka Banua Lawas adalah salah asa masigit nang panuhanya di Paropinsi Kalimantan Salatan, Indunisia nang andakannya di disa Banua Lawas, Kabupatin Tabalong. Masigit ngini gin rancak disambat Masjid Pasar Arba marga pada hari arba, nang bailang/bajiarah ka sini labih banyak daripada hari nang lain.[1]
Masigit ngini dibangun tahun 1625 masihi nang digagas ulih Khatib Dayan wan dangsanaknya Sultan Abdurrahman (matan Kasultanan Banjar nang bapusat di Kuin). Khatib Dayan digani'i tukuh-tukuh masyarakat Dayak, jua Datu Ranggana, Datu Kartamina, Datu Saripanji, Langlang Buana, Taruntung Manau, Timba Sagara, Layar Sampit, Pambalah Batung dan Garuntung Waluh.[1]
Di hambin muka masigit, ada dua tajau (wadah tampungan banyu nang bahari diguna'akan urang Dayak hagan mamandiakan anak nang hanyar lahir). Walau disangat matahari, tagal dua tajau nang usianya mancapai 400 tahun nintu kada ba-ubah warnanya.[1]
Para pajiarah ka sana kada lupa mambawa bulik banyu dalam tajau nintu marga diyakini warga baisi barakat hagan diguna'akan mambasuh muha atawa dikinum. Kabanyakan buhannya datang ka masigit pada hari arba marga pasnya hari pasar di Banua Lawas. Buhannya manyawatakan diri jiarah, salain hagan baibadah antara lain sumbahyang sunat tahiyatul masjid wan mambaca surah Ya Sin, jua ada nang mangaku mambayar nazar, marga harapannya takabul.[1]
Di higa masigit tahaga alkah warga tumatan bahari wan salah asa nang lain pada nang lain adalah bangunan (kubah) nang marupakan makam pajuang Banjar bangaran Penghulu Rasyid.[1]